Nashik News : जगात शांतता व मानवता प्रस्थापित करण्यासाठी अग्रेसर असलेल्या युनायटेड नेशन (युएन)च्या युनायटेड नेशन पीस किपिंग फोर्स यात राज्य गुप्तवार्ता विभागाच्या नाशिकमधील सहायक आयुक्त माणिक पत्की यांची निवड करण्यात आली आहे. देशभरातील ६९ पोलीस अधिकाऱ्यांमध्ये महाराष्ट्र पोलीस दलातून निवड झालेल्या माणिक पत्की या एकमेव महिला अधिकारी आहेत. (Nashik Assistant Commissioner Patki in UN Special Force)

जगभरातील अनेक देशांमध्ये आजही युद्ध, अन्न-धान्याची कमतरता, शिक्षणाचा अभाव, देशांतर्गत गृहकलह यामुळे अशांतता आहे. अशा देशांमध्ये, तेथील नागरिकांमध्ये शांतता प्रस्थापित व्हावी, तेथील जनजीवन पूर्वपदावर यावे, यासाठी युनायटेड नेशन पिस किपिंग फोर्सच्या माध्यमातून विशेष प्रयत्न केले जातात. युएनच्या या विशेष फोर्सच्या माध्यमातून जगभरातील पोलीस दलातील अधिकारी वर्षभर अशा देशांमध्ये जाऊन त्याठिकाणी शांतता निर्माण करण्यासाठी सेवा बजावत असतात.

युएनच्या या फोर्समध्ये निवडीसाठी राष्ट्रीय पातळीवर देशभरातील पोलीस अधिकाऱ्यांकरीता परीक्षा घेण्यात येत असते. २०२२-२०२४ या वार्षिक गटासाठी घेतलेल्या परीक्षेमध्ये देशभरातून ६९ पोलिस अधिकाऱ्यांची निवड करण्यात आलेली आहे. (latest marathi news)

त्यात महाराष्ट्र पोलिस दलातील माणिक पत्की या एकमेव महिला अधिकारीचा समावेश आहे. पत्की यांनी मुंबई, सांगली, सीआयडी, सीबीआय, नागपूर, नाशिक येथे सेवा बजावली आहे. सध्या त्या नाशिकमध्ये राज्य गुप्तवार्ता विभागात सहायक पोलीस आयुक्त म्हणून कार्यरत आहेत.

‘जुबा’मध्ये नियुक्ती

माणिक पत्की यांनी परीक्षेत यश प्राप्त केल्याने त्यांची युएनच्या विशेष फोर्समध्ये एका वर्षासाठी निवड झालेली आहे. त्या पूर्व आफ्रिकेतील दक्षिण सुदान या देशात ५ जूनपासून रुजू झाल्या आहेत. त्यांच्याकडे ‘जुबा’ या शहरात क्षेत्रीय अधिकारी (फिल्ड ऑफिसर) म्हणून जबाबदारी देण्यात आली आहे.