सिन्नर : माळेगाव औद्योगिक वसाहतीतील ऑटो स्पेअर पार्ट्‌स बनविणाऱ्या सिन्नर ऑटो कॉम या ऑटोमोबाईल्स कारख्यानाला रविवारी (ता. १४) सायंकाळी सहा ते साडेसहाच्या दरम्यान भीषण आग लागली. क्षणार्धात आगीचे लोळ सर्वदूर दिसू लागल्याने अनेकांनी कंपनीकडे धाव घेतली. सुदैवाने आगीत जीवितहानी झाली नसली, तरी मोठी वित्तहानी झाल्याचा प्राथमिक अंदाज वर्तविण्यात येत आहे. (Auto com company in Malegaon Colony on fire Big financial loss)

सिन्नर अग्निशमन दल व एमआयडीसी अग्निशमक दलाच्या कर्मचाऱ्यांनी सुमारे चार ते पाच तास अथक शर्तीचे प्रयत्न करून आग आटोक्यात आणली. आगीत वरचा मजला पूर्ण खाक झाला आहे. ऑटोकॉम प्रा. लि. कंपनीत रविवारी सायंकाळी कामगार काम करीत असताना, अचानक दुसऱ्या मजल्यावर आग लागली. आग निदर्शनास येताच कामगारांना सुरक्षित कंपनीबाहेर काढण्यात आले.

घटनेची माहिती माळेगाव औद्योगिक वसाहतीतील अग्निशमन दलाला दिली. त्यावरून अग्निशमन दलाचा बंब घटनास्थळी दाखल झाला. आग मोठ्या प्रमाणात असल्याने सिन्नर पालिकेच्या अग्निशमन दलालाही पाचारण करण्यात आले. दोन्ही दलाच्या बंबांच्या सुमारे आठ ते नऊ फेऱ्या होऊन आग आटोक्यात आणण्यात यश आले. (latest marathi news)

आगीत कारखान्याचा दुसरा मजला पूर्णपणे खाक झाला असून, तेथे ठेवलेले लाखोंचे पॅकिंग मटेरियलचे नुकसान झाल्याचे समजते. सुदैवाने या घटनेत कुठलीही जीवितहानी झाली नसली, तरी कारखान्याचे मोठे आर्थिक नुकसान झाल्याची माहिती ‘सीमा’चे सचिव बबन वाजे यांनी दिली.

या कारखान्यात विविध वाहनांचे स्पेअर पार्ट बनविण्यात येतात. कारखान्यात साधारणतः एका शिफ्टमध्ये २०० ते २५० कामगार काम करतात. सुदैवाने सर्व कामगार सुरक्षित असल्याचे उद्योजकांनी सांगितले.