Nashik News : शहरातून पंचवटीत जाण्यासाठी व पंचवटीतून शहरात येण्यासाठी जवळचा मार्ग म्हणून तत्कालीन नगरपालिकेच्या काळात गोदावरीवर रामसेतूची निर्मिती करण्यात आली. परंतु आजवर अनेक छोट्या पुरांबरोबरच तब्बल चार महापूर अनुभवलेल्या रामसेतूची अवस्था मनपासह स्मार्टसिटीच्या दुर्लक्षाने सध्या तोळामासा झाली आहे. तत्कालीन नाशिक नगर पालिकेच्या काळात कै. भय्यासाहेब पांडे नगराध्यक्ष असताना रामसेतूची उभारणी करण्यात आली. (nashik bad condition of Ram Setu ram bridge marathi news)

अनेक पूर अनुभवलेल्या रामसेतूवरील स्लॅब वाहून गेल्याने पुलाला अनेक ठिकाणी खड्डे पडले आहेत. त्यातच अतिक्रमणाने हा पूल अधिक जर्जर व बकाल झाला आहे. पुलावरून वाहने नेण्यास मज्जाव असतानाही अनेक जण थेट पुलावरच दुचाकींसह रिक्षाही उभ्या करतात. तसेच वाहतूकही बिनदिक्कत सुरू आहे.

मध्यंतरी गोदाघाटावरील इतर स्मार्ट कामांबरोबरच या पुलाच्या जागी भव्य व कमानींच्या आकाराचे पुलाचे नियोजन करण्यात आले होते. येतील काही व्यावसायिकांच्या विरोधानंतर स्मार्ट सिटीने तो प्रकल्पच गुंडाळून ठेवला. नंतर शासकीय संस्थेच्या माध्यमातून या पुलाचे स्ट्रक्चरल ऑडिटही करण्यात आल्यावर नवीन पुलाऐवजी डागडुजी करण्याचे ठरले.

परंतु गोदाघाटावरील बहुतेक कामे संपत आली तरी कंपनीचे दुरुस्तीचे काम अद्यापही सुरू झालेले नाही. त्यामुळे पुढील काळात हा पूल किती काळ शहर व पंचवटीचा सेतू म्हणून काम करेल, याबाबत साशंकताच आहे. (latest marathi news)

अतिक्रमणाने बकाल स्वरूप

पुलावरील सिमेंटचा स्लॅब अनेक ठिकाणी वाहून गेल्याने ठिकठिकाणी खड्डे पडले आहेत. त्यातच दोन्ही बाजूंनी व्यावसायिकांनी अतिक्रमण केल्याने तसेच ऊन लागू नये, म्हणून कठड्यावर प्लॅस्टिकसह ताडपत्री, गोण्या, दोरखंडाने बांधल्याने पुलाला बकाल स्वरूप प्राप्त झाले आहे. पुलाला खेटून व चक्क नदीपात्रात बांधण्यात आलेल्या येथील हॉटेलच्या मालकाने याच व्यावसायिकांच्या मदतीने नवीन पुलास विरोध केल्याने ते काम रद्द झाल्याचे काही अधिकाऱ्यांनी सांगितले. त्यामुळे नवीन पूल सोडाच पुलाची दुरुस्तीही झालेली नाही.

''शहरातून पंचवटीत जाण्यासाठी हा सर्वात जवळचा मार्ग आहे. त्यामुळे नवीन पूल होत नसेल तर किमान या पुलाची पावसाळ्यापूर्वी डागडुजी करून पुलाला बळकटी द्यावी.''- दत्ता पवार, स्थानिक व्यावसायिक