नाशिक : नाशिक येथे एका चिमुकल्याचा घरातच झोका खेळता खेळता मृत्यू झाल्याची धक्कादायक घटना घडली आहे. नाशिकच्या अंबड भागातील चुंचाळे आश्विनी नगर परिसरात असलेल्या म्हाडा कॉलनीत ही घटना घडल्याची माहिती आहे. निखिल असं या चिमुकल्याचं नाव असल्याची माहिती समोर आहे.

अधिक माहितीनुसार, घरात कुणीही नसताना १० वर्षांचा निखील त्याच्या छोट्या भावासोबत खेळत होता. पण त्याने झोका गोल गोल फिरवल्यामुळे त्याच्या गळ्याला गळफास लागला आणि त्याचा यामध्ये मृत्यू झाला. त्याच्या मृत्यूनंतर अंबड पोलिस स्टेशनमध्ये अकस्मात मृत्यूची नोंद करण्यात आली आहे.

दरम्यान, निखिलला गळफास लागल्यानंतर त्याचा भाऊ आईकडे पळत गेला आणि "निखिल झोका खेळताना पडला आणि तो काहीच बोलत नाही" असं सांगतिलं. त्यानंतर आईने आल्यावर पाहिलं तेव्हा निखिल निपचीत पडला होता. आईने त्याच्या गळ्यावरील दोरी कापली पण त्याचा काही फायदा झाला नाही.

या घटनेनंतर निखिलच्या आईने हंबरडा फोडला, आवाज ऐकून शेजारचे लोकं जमा झाले. त्यांनी निखिलला जिल्हा रूग्णालयात दाखल केले पण त्याला डॉक्टरांनी मृत घोषित केले. पण या घटनेने परिसरात हळहळ व्यक्त केली जात आहे.

आपलेही लहान मुले घरात किंवा अंगणात खेळत असतील तर अशा गोष्टींची काळजी घेतली पाहिजे. त्याचबरोबर पालकांनी आपल्या पाल्यांवर लक्ष ठेवणे गरजेचे आहे. पालकांच्या निष्काळजीपणामुळे अनेक चिमुकल्यांचे जीव गेल्याच्या घटना याआधी घडल्या आहेत.