नाशिक : जिल्‍ह्यात उपचार घेणाऱ्या सक्रिय कोरोनाबाधितांच्‍या संख्येत पुन्‍हा वाढ होऊ लागली आहे. नव्‍याने आढळणाऱ्या कोरोनाबाधितांच्‍या तुलनेत कोरोनामुक्‍त रुग्‍णांची संख्या कमी राहात असल्‍याने ही वाढ होत आहे. शुक्रवारी (ता. १७) जिल्‍ह्यात ९४ रुग्‍णांचे अहवाल पॉझिटिव्‍ह आले, तर ६४ रुग्‍णांनी कोरोनावर मात केली. एका बाधिताचा उपचारादरम्‍यान मृत्‍यू झाला. जिल्‍ह्यातील ॲक्‍टिव्‍ह रुग्‍णसंख्या पुन्‍हा एक हजाराच्‍या उंबरठ्यावर येऊन पोचली आहे. सद्यःस्‍थितीत जिल्‍ह्यात ९८० बाधितांवर उपचार सुरू आहेत.

शुक्रवारी नाशिक महापालिका क्षेत्रातील २७, तर नाशिक ग्रामीणमधील ६३ रुग्‍णांना कोरोनाची लागण झाली. बऱ्याच दिवसांनंतर मालेगाव महापालिका क्षेत्रात दोघा रुग्‍णांचे कोरोनाचे अहवाल पॉझिटिव्‍ह आले. जिल्‍हाबाहेरील दोघांना कोरोनाची लागण झाली. दरम्‍यान, जिल्‍ह्यात दिवसभरात एका बाधिताच्‍या मृत्‍यूची नोंद असून, हा मृत नाशिक ग्रामीणमधील आहे.

सायंकाळी उशिरापर्यंत एक हजार ५९ रुग्‍णांना अहवालाची प्रतीक्षा होती. यापैकी नाशिक ग्रामीणमधील ५८२, नाशिक शहरातील २४२, तर मालेगावच्‍या २३५ रुग्‍णांचे अहवाल प्रलंबित होते. जिल्‍हाभरातील रुग्‍णालये व गृहविलगीकरणात ७१९ रुग्‍ण दाखल झाले. यात नाशिक महापालिका क्षेत्रातील ६९३ रुग्‍णांचा समावेश होता. जिल्‍हा रुग्‍णालयात तीन, तर डॉ. वसंतराव पवार वैद्यकीय महाविद्यालयात सहा रुग्‍ण दाखल झाले. नाशिक ग्रामीणमधील १५, तर मालेगावच्‍या दोघांचा यात समावेश होता. दरम्‍यान, जिल्‍ह्यातील एकूण कोरोनाबाधितांची संख्या चार लाख सात हजार २०१ वर पोचली असून, यापैकी तीन लाख ९७ हजार ६१२ रुग्‍णांनी कोरोनावर यशस्‍वी मात केली आहे. आतापर्यंत आठ हजार ६०९ बाधितांचा कोरोनाने बळी घेतला आहे.