सिडको : प्रभागातील नागरी समस्या सोडविण्यासाठी नाशिक महापालिकेतर्फे दर वर्षी घसघशीत नगरसेवक, प्रभाग व विशेष विकासनिधी दिला जातो. मात्र, तो नेमका कोठे व कशासाठी खर्च केला जातो, याचा थांगपत्ता शेवटपर्यंत नागरिकांना लागत नाही. महापालिका निवडणुकीच्या पार्श्वभूमीवर जनता जनार्दन त्याचा हिशेब ‘डंके की चोट पर’ मागताना सध्या दिसत आहे.

नाशिक महापालिका निवडणुकीच्या पार्श्वभूमीवर सध्या विद्यमान नगरसेवक कॅलेंडर, माहितीपत्रकवाटप व घरोघरी भेटीगाठीवर जोर देत आहेत. हे करीत असताना, त्यांना दर वर्षी प्राधान्याने मिळणारा नगरसेवक, प्रभाग व विशेष विकासनिधी नेमका कोणत्या कामासाठी व कोठे खर्च केला, याची माहिती ‘डंके की चोट पर’ जाणकार नागरिक दारी आलेल्या नगरसेवकांना विचारत आहे. त्यावर बहुतांश नगरसेवकांची चांगलीच धांदल उडत आहे. दर वर्षी नगरसेवक निधी, प्रभाग विकासनिधी व विशेष निधी दिला जातो. असे कोट्यवधी रुपये प्रत्येक नगरसेवकाला मिळतात. त्यात ते रस्ते, ड्रेनेज, पाइपलाइन, बेंचेस, गार्डन, संगणक खरेदी, अभ्यासिका, योगावर्ग, रंगरंगोटी, गार्डनमधील खेळणी, ग्रीन जिम, वीजखांब, पेव्हर ब्लॉक, कॉन्सन्ट्रेटर अशा विविध विकासकामांचा समावेश करतात.

पहिल्या वर्षी ७५ लाख, त्यानंतर सलग चार वर्षे ४२ लाख, शेवटच्या वर्षी विशेष निधी सव्वाकोटी रुपये मिळाला. असा पाच वर्षांत अंदाजे ३६८ कोटी रुपये प्रत्येकी एका नगरसेवकाला मिळाला. अशा एकूण १२२ नगरसेवकांना जवळपास चार ते साडेचार कोटी रुपये मिळाले असावेत. त्यांनी नेमका हा खर्च कोठे व कशासाठी खर्च केला, याची माहिती सर्वसामान्य जनतेला मिळणे आवश्यक असल्याची मागणी आता जोर धरू लागली आहे. त्याव्यतिरिक्त महासभेत विकासकामांसाठी विशेष निधी दिला जातो, तो वेगळाच!