नाशिक : बॅकिंगच्या कामाकरिता कोणत्याही बँकेकडून खातेदारांना संपर्क साधला जात नाही. तसे संदेश बँकांकडून वारंवार खातेदारांच्या मोबाईलवर पाठविले जातात, असे असतानाही सायबर भामट्यांनी शहरातील तिघांना क्रेडिट कार्ड ॲक्टिव्ह करण्यासाठी बँकेतून बोलत असल्याचे सांगत त्यांच्याकडून गोपनीय माहिती घेत तब्बल साडेआठ लाख रुपय त्यांच्या बँक खात्यातून ऑनलाईन वर्ग करून घेत गंडा घातला आहे. याप्रकरणी शहर सायबर पोलिसात गुन्हा दाखल करण्यात आला आहे. (Nashik ​​cyber Crime 3 cheated on pretext of activating credit card marathi new)

बाळासाहेब सुखदेव जाधव (५७, रा. गुलमोहोर कॉलनी, आनंदननगर, मुक्तिधाम मागे, नाशिकरोड) यांच्या फिर्यादीनुसार, त्यांच्यासह शहरातील अन्य दोघांना सायबर भामट्याने आर्थिक गंडा घातला. जाधव हे त्यांच्या कामात व्यस्त असताना गेल्या जुलै २०२३ मध्ये त्यांना सायबर संशयितांनी आयसीआयसीआय आणि एसबीआय बँकेतून बोलत असल्याचे सांगत, ‘तुमचे क्रेडीट कार्ड सध्या डिअॅक्टिव्हेट आहे.

ते पुन्हा सुरु करण्यासाठी संपर्क साधल्याचे सांगितले. तसेच, क्रेडिट कार्ड सुरू केल्यानंतर बँकेकडून भविष्यात देण्यात येणाऱ्या फायदे सांगत त्यांचा विश्वास संपादन केला. सायबर भामट्यांच्या जाळ्यात तिघेही संशयित सापडले आणि त्यांनी त्यांचे बंद असलेले क्रेडिट कार्ड पुन्हा सुरू करण्यासाठी होकार दिला. (Latest Marathi News)

त्यानंतर सायबर भामट्यांनी तिघांनाही जुलै ते नोव्हेंबर २०२३ या दरम्यान वेगवेगळ्या कालावधीत मोबाईलवर संपर्क साधत त्यांना कार्ड सुरू करण्यासाठीची प्रक्रिया करण्यास भाग पाडले. त्यांनी त्यांच्याचकडून कार्डची गोपनीय माहितीसह आलेला ओटीपीही घेतला. त्यानंतर संशयित सायबर भामट्यांनी तिघांच्याही ओटीपी आणि सीव्हीव्ही नंबर मिळताच तिघांच्याही बँक खात्यातून ८ लाख ५२ हजार २६९ रुपये ऑनलाईन परस्पर काढून घेत दुसर्या बँकांमध्ये वर्ग केले.

"कोणत्याही बँकेकडून आपल्या ग्राहकांना संपर्क साधला जात नाही. त्यामुळे अशा फोनवर विश्वास ठेऊ नये. शंका असल्यास तत्काळ बँक वा सायबर पोलिसांकडे संपर्क साधावा. अनोळखी व्यक्तींला आपल्या बँकेसंदर्भातील कोणतीही गोपनीय माहिती देऊ नये. यामुळे फसवणूक होण्याची शक्यता बहुतांशी कमी होते."

- रियाज शेख, वरिष्ठ पोलिस निरीक्षक, शहर सायबर पोलीस ठाणे.