Nashik Fraud Crime : बँकेने जप्त केलेली प्रॉपर्टी, घर लिलावातून कमी किमतीमध्ये मिळवून देण्याचे आमिष दाखवून आर्थिक फसवणूक केल्‍याचा प्रकार समोर आला आहे. सप्‍टेंबर २०२३ पासून आजवर भामट्यांनी संबंधिताला तब्‍बल नऊ लाख रुपयांना गंडविले आहे. याप्रकरणी सातपूर पोलिस ठाण्यात दोघांविरोधात गुन्‍हा दाखल झाला आहे. (nashik crime financial fraud has come to fore by showing lure of getting flat)

अशोक अप्पाजी लहामगे (वय ५८, श्रमिकनगर) यांनी सातपुर पोलिस ठाण्यात फिर्याद दिली आहे. संशयित राहुल वासुदेव भडांगे (वय ३२, रा.तांबे मळा, शांतिनगर, पंचवटी) आणि सोमनाथ विठ्ठल धात्रक (वय ३६, रा. हमालवाडी, पेठरोड, पंचवटी) असे आर्थिक फसवणूक केलेल्‍या दोघा संशयितांची नावे आहेत.

फिर्यादीत म्‍हटले आहे, की गेल्‍या वर्षी सप्‍टेंबर महिन्‍यात भामट्यांनी श्री. लहामगे यांच्‍याशी संपर्क साधत बँक ऑफ महाराष्ट्र यांनी जप्त केलेली प्रॉपर्टी, घर लिलावात कमीत कमी किमतीत मिळवून देण्याचे आमिष दाखविले. व त्‍याच्‍या मोबदल्‍यात दलाली पोटी वेळोवेळी पैशांची मागणी केली. त्‍यानुसार फिर्यादीदार लहामगे यांनी तब्‍बल नऊ लाख रुपयांची रक्‍कम या भामट्यांनी दिली. मात्र त्‍यांच्‍याकडून कुठल्‍याही स्वरूपाची मालमत्ता उपलब्‍ध करून न दिल्‍याने, आपली फसवणूक झाल्‍याचे त्‍यांच्‍या निदर्शनात आले. व त्‍यांनी पोलिस ठाण्यात धाव घेताना गुन्‍हा दाखल केला आहे.