नाशिक : गंगापूर गावानजिकच्या जकात नाका येथे मद्याच्या नशेमध्ये वाहनांना अडवून काचा फोडल्या तर काही वाहनचालकांवर चाकूने हल्ला करणार्या संशयित टोळक्याच्या गंगापूर पोलिसांनी मुसक्या आवळल्या असून, गंगापूर गावातून या गावगुंडांची धिंड काढली. यावेळी पोलिसांनी संशयितांना भररस्त्यावर चोफ देत त्यांची मस्ती उतरवली. यामुळे त्रस्त नागरिकांनीही समाधान व्यक्त केले आहे. (village gangsters were taken out by police)

अनिकेत उर्फ अंड्या पप्पू शार्दूल (१९, रा. राजीवनगर, गोवर्धनगाव), प्रतिक विष्णू जाधव (१९, रा. मोतीवाला कॉलेजसमोर, दत्त मंदिर, शिवाजीनगर), विजय दादू खोटरे (१९, रा. भवर टॉवर, शिवाजीनगर), कपिल उर्फ चिंटू बाळू गांगुर्डे (२१, रा. मोठा राजवाडा, गंगापूर गाव), रोहित उत्तम वाडगे (१९, रा. मोठा राजवाडा, गंगापूर गाव) अशी अटक करण्यात आलेल्या संशयितांची नावे आहेत.

संशयितांनी मद्याच्या नशेमध्ये धुंद होत गेल्या मंगळवारी (ता. १३) रात्री अकराच्या सुमारास गंगापूर गाव जकात नाक्याजवळ भररस्त्यावर येणार्या जाणार्या वाहनांना अडवून चालकांशी हुज्जत घातली. यावेळी संशयितांनी जय गजभिये यांच्या हुंडाई कार (एमएच १५ एचक्यु ०७१०), मयुर मोरे यांची टाटा व्हिस्टा कार (एमएच १५ डीएम ८२३२), विजय रसाळ यांचा टेम्पो (एमएच १६ एई ४८५२) यांच्या वाहनांवर दगडफेक करीत काचा फोडून नुकसान केले.

तसेच, गजभिये, कुशल भगत, ओमकार वाळुंज यांनी संशयितांना जाब विचारला असता, टोळक्यातील एकाने त यांच्यावर चाकूने हल्ला करीत जीवे मारण्याचा प्रयत्न केला होता. त्यामुळे भयभीत झालेल्या गजभिये यांनी गंगापूर पोलिसात फिर्याद दिली असता, संशयितांविरोधात प्राणघातक हल्ल्यासह विविध कलमान्वये गुन्हे दाखल करण्यात आले होते.

या गुन्ह्याचा तपास वरिष्ठ पोलीस निरीक्षक तृप्ती सोनवणे यांच्या मार्गदर्शनाखाली गुन्हेशोध पथकाचे उपनिरीक्षक मोतीलाल पाटील यांना मिळालेल्या माहितीनुसार संशयितांना कोकणगाव (ता. दिंडोरी) येथून अटक केली.

पोलिसी खाक्या दाखविताच संशयितांची गुन्ह्याची कबुली दिली. त्यानंतर संशयितांची गंगापूर गाव परिसरातून धिंड काढण्यात आली. तसेच, चोफही दिला. सदरची कामगिरी, उपनिरीक्षक मोतीलाल पाटील, गिरीश महाले, रवी मोहिते, मच्छिंद्र वाकचौरे, सोनू खाडे, गोरख साळुंके, थविल यांच्या पथकाने केली.