Nashik News : मनमाडचे पोलिस उपअधीक्षक बाजीराव महाजन यांच्या नेतृत्वाखाली शिवसेना (उबाठा) पक्षाचे नांदगाव तालुकाप्रमुख संतोष गुप्ता यांच्या मालेगाव रोडवरील शनिमंदिर परिसरातील दुकानावर टाकलेल्या छाप्यात रॅपर असलेल्या गांजा जप्त करण्यात आला. गुप्ता यांना अटक केली असून, रात्री उशिरापर्यंत पोलिसांत गुन्हा दाखल करण्याचे काम सुरू होते. (Nashik Crime News)

दरम्यान, राजकीय षडयंत्र रचून संतोष गुप्ता यांच्यावर खोटा गुन्हा दाखल केल्याचा आरोप शिवसेना (उबाठा) पक्षाचे जिल्हाध्यक्ष गणेश धात्रक यांनी केला आहे. पोलिसांच्या कारवाईच्या निषेधार्थ शिवसेनेतर्फे (उबाठा) मंगळवारी (ता. २५) नांदगाव बंदची हाक दिली आहे. शनिमंदिर परिसरात संतोष गुप्ता यांच्या दुकानावर पोलिस उपअधीक्षक बाजीराव महाजन यांच्या पथकाने तहसीलदार सुनील सैंदाणे यांच्या उपस्थितीत छापा टाकला.

तेथे आठ किलो गांजा व विमल गुटख्याच्या चाळीस पुड्या जप्त करण्यात आल्या. पोलिस ठाण्याबाहेर गर्दी झाली होती. शिवसेना (उबाठा) जिल्हाप्रमुख गणेश धात्रक यांनी गुप्ता यांच्यावर कारवाई करणाऱ्या पोलिस उपअधीक्षक बाजीराव महाजन यांची भेट घेतली व पोलिसांनी कोणतीही शहानिशा व चौकशी न करता दाखल केलेला खोटा गुन्हा तात्काळ मागे घ्यावा. (latest marathi news)

योग्य ती तपासणी व चौकशी करून खोट्या गुन्ह्यातून संतोष गुप्ता यांची मुक्तता करावी, अशी मागणी केली. मात्र, ही कारवाई तहसीलदार व पंचांसमोर करण्यात आल्याचे श्री. महाजन यांनी श्री. धात्रक यांना सांगितले.

दरम्यान, मंगळवारी बंदचे आवाहन करणारे मेसेज मोठ्या प्रमाणात व्हायरल करण्यात आले असून, फलकही लावले आहेत.