Nashik Crime News : लोकसभा निवडणुकीच्या पार्श्वभूमीवर शहर पोलिसांनी अवैध मद्यविक्रीविरोधात आक्रमक भूमिका घेत धडक कारवाईचा बडगा उगारला आहे. पोलिसांनी बुधवारी (ता. ३) रात्री केलेल्या कारवाईमध्ये सुमारे २२ हजार रुपयांचा अवैध देशीदारुचा साठा जप्त केला आहे. येत्या काळात अवैध धंदे व अवैध मद्यविक्री व साठा करण्याविरोधात पोलिसांकडून तीव्र मोहीम राबविली जाणार असल्याचे संकेत दिले आहेत. (Nashik Crime Strike action against illegal gavthi liquor news)

अंबड औद्योगिक वसाहतीतील शांतिनगर झोपडपट्टी परिसरात किराणा दुकानातून अवैधरीत्या देशी दारू विक्री सुरू असल्याची माहिती मिळताच चुंचाळे पोलिस चौकीच्या पथकाने छापा टाकत संशयित निवृत्ती तुकाराम शेळके (५७, रा. शांतिनगर) यास अटक करून त्याच्याकडून १ हजार ६८० रुपयांच्या देशीदारुच्या बाटल्या जप्त केल्या.

कालिकानगरमधील सार्वजनिक शौचालयाच्या बाजूला पत्र्याच्या शेडमधून अवैधरीत्या देशीदारु विक्रीचा अड्डा सुरू असल्याची माहिती मिळताच मुंबई नाका पोलिसांनी छापा टाकून संशयित संतोष भगवान आढाव (३९, रा.कालिकानगर) यास अटक करीत त्याच्याकडून १ हजार ७५० रुपयांची देशीदारूच्या बाटल्या जप्त केल्या.

पंचवटीतील वाघाडीच्या बुरुडवाडीमध्ये सुरू असलेल्या देशीदारु अड्ड्यावर पोलिसांनी छापा टाकत संशयित संजय प्रकाश शिरसाठ (३०, रा. संजयनगर, वाघाडी, पंचवटी) यास अटक करून त्याच्याकडून २ हजार १३० रुपयांची देशीदारूच्या बाटल्या जप्त केल्या.  (latest marathi news)

आडगाव हद्दीतील मिरची चौक ते अमृतधाम चौक या रस्त्यालगत पत्र्याच्या शेडमध्ये सापडला. शहर गुन्हे शाखेच्या अमली पदार्थ विरोधी पथकाने खबर मिळताच छापा टाकत त्याठिकाणाहून १६ हजार २६० रुपयांच्या देशीदारुचा अवैधरीत्या साठा व विक्री करताना जप्त करण्यात आला. संशयित नागेश भानुदास मोरे (३३, रा. पंचवटी) यास अटक करण्यात आली.

"अवैधरीत्या देशीदारुची विक्री व साठा करणाऱ्या विरोधात पोलिसांना धडक कारवाईच्या सूचना केल्या आहेत. अवैधरीत्या मद्यविक्री सुरू असल्यास पोलिसांच्या ९९२३३२३३११ या व्हॉटसॲप क्रमांकावर कळवावे."- प्रशांत बच्छाव, पोलिस उपायुक्त, शहर गुन्हे शाखा.