मालेगाव शहर : शहरातील अनेक कॉलनी, नवीन वसाहती भागात चोरांचा सुळसुळाट वाढला आहे. नवरात्रोत्सव व सणांच्या पार्श्वभूमीवर चोरांनी मोर्चा नववसाहती व कॉलनी भागाकडे वळवला आहे. (Thieves on prowl in colony area Increase in burglaries in Malegaon)

परिसरातील विविध कॉलनीतील नागरिक व तरूणांच्या बैठका घेऊन दक्षता घेण्याच्या सूचना देत आहेत. कॉलनी सुरक्षा पथक स्थापन करण्यासह सीसीटीव्ही कॅमेरे बसवून, वॉचमन नेमावेत. दिवसभरात फेरीवाले, फिरस्ते,अनोळखी व्यक्तींपासून सावधान राहावे असे आवाहन पोलिस यंत्रणेने केले आहे.

शहरातील मुख्य रस्त्यासह काही ठिकाणी मोबाईल स्नॅचिंग, रस्त्यावरून चालणाऱ्यांच्या हातून मोबाईल हिसकावण्याचे प्रकार वाढले आहेत. महिला व ज्येष्ठ नागरिक यांना सायंकाळी व रात्री घराबाहेर पडणं मुश्कील झाले आहे. पोलिसांनी रात्री उशिरापर्यंत गस्त वाढवावी अशी मागणी नागरिकांनी केली आहे.

नामपूर रोडवर अंधार

मालेगाव कॅम्प येथील पोलिस अधिकाऱ्यांनी स्थानिक नागरिक व तरुणांच्या समवेत बैठका घेऊन पाठबळ देण्याचा प्रयत्न केला आहे. चर्चगेट ते नामपूर रोड या गजबजलेल्या भागात स्ट्रीट लाईटचा अभाव आहे. कॅम्प भागातील नव्याने मोठ्या प्रमाणावर वसाहती नामपूर रोड, भोसले पेट्रोल पंपाच्या पुढे पर्यंत वाढली आहे. त्याप्रमाणात नागरी सोयी सुविधा नसल्याचा गैरफायदा चोरट्यांनी उचलला आहे. (latest marathi news)

भूखंडावरील गवताचा अडसर

सार्वजनिक बांधकाम विभागाच्या कार्यालयाच्या परिसरातील आनंद सोसायटी, प्रेरणा सोसायटी, राजमाता जिजाऊ नगराचा भागाच्या मागील बाजूस मोठ्या प्रमाणावर मोकळे भूखंड आहेत. पाच ते सहा फुटांवर गवत वाढले आहे.अनेक बांधकाम चालू असलेल्या बंगल्यांसह, रिकामे शेड चोरट्यांना दडून बसण्यासाठी आयती जागा मिळाल्याने चोरांचे फावले आहे.

जागते रहो...

कॅम्प भागातील सार्वजनिक बांधकाम विभागाच्या कार्यालयाच्या परिसरातील आनंद सोसायटी,प्रेरणा सोसायटी, आदर्श कॉलनी,राजमाता जिजाऊ नगर या भागासह परिसरात चोरी करण्याचा प्रयत्न झाला आहे. गेल्या आठ दिवसांपासून या कॉलनी परिसरातील तरुण मंडळी 'जागते रहो' मोहीम राबवत आहे.

राजमाता जिजाऊ नगर भागात एका घराच्या ओट्यावर असलेल्या मोटार सायकल चोरीचा प्रयत्न फसल्यानंतर या चोरट्यांचा शोध या परिसरातील तरूणांनी घेतला. या भागात असलेल्या मोकळ्या भूखंडावरील झाडी झुडपे व वाढलेल्या गवताचा आधार घेऊन ते पसार झाले. या घटनेनंतर पोलिस यंत्रणा खडबडून कामाला लागली आहे.