नाशिक : गुरुवारी (ता. २३) दिवसभरात जिल्ह्यात ५१५ जणांचे कोरोना अहवाल पॉझिटिव्ह आले, तर दुसरीकडे ४२८ रुग्णांनी कोरोनावर मात केली आहे. त्याच वेळी शहरात नऊ, ग्रामीण भागात दोन आणि मालेगाव व अन्य जिल्ह्यातील प्रत्येकी एक असे १३ रुग्ण कोरोनामुळे दगावले आहेत. 

कोरोनाबळींची एकूण संख्या ४३३

बरे झालेल्या रुग्णांमध्ये २८८ नाशिक शहरातील, १३८ ग्रामीण भागातील, तर दोन जिल्हाबाह्य रुग्ण आहेत. सध्या कोरोनामुळे होणाऱ्या मृत्यूंवर नियंत्रण मिळविण्याचे आवाहन आरोग्य यंत्रणेपुढे आहे. रुग्णांनीदेखील वेळीच उपचार प्रक्रियेत दाखल होणे आवश्‍यक आहे. दरम्यान, गुरुवारी झालेल्या १३ मृत्यूंपैकी नऊ शहरातील आहेत. त्यात जुने नाशिक परिसरातील ४८ वर्षीय, इंदिरानगर येथील ७६ वर्षीय, सातपूर येथील ५६ वर्षीय, दिंडोरी नाका येथील ७८ वर्षीय, सातपूर येथील ९२ वर्षीय, जय भवानी रोड येथील ७२ वर्षीय, कृष्णानगर, अग्रवाल वाडी येथील ४९ वर्षीय, सायखेडा रोडवरील ७८ वर्षीय पुरुषाचा समावेश आहे. 

7 हजार 798 कोरोनामुक्त

दिवसभरात आढळलेल्या ५१५ रुग्णांत ३७७ जण नाशिक शहरातील आहेत. ग्रामीण भागातील १३०, तर मालेगाव महापालिका हद्दीतील आठ रुग्ण आहेत. जिल्ह्यात सध्या अॅक्टिव्ह रुग्णसंख्या 10 हजार 969 असून, 7 हजार 798 कोरोनामुक्त झाले आहेत. मालेगाव येथील ५८ वर्षीय महिला आणि अकोले (जि. नगर) येथील ६८ वर्षीय पुरुषाचाही कोरोनाने मृत्यू झाला आहे. ग्रामीण भागात खेडगाव येथील ७९ वर्षीय पुरुष आणि देवळाली कॅम्प येथील ८० वर्षीय पुरुषाचा उपचार सुरू असताना मृत्यू झाला आहे. त्यामुळे जिल्ह्यातील कोरोनाबळींची एकूण संख्या ४३३ झाली आहे. 

हेही वाचा > दुर्देवी! पहाटेची वेळ...गर्भवती मादीने अचानक पुलावरुन मारली उडी...असं काय घडलं?

तेराशे संशयित दाखल 

तपासणी मोहिमांमुळे प्राथमिक स्तरावर रुग्ण उपचार प्रक्रियेत येत आहेत. यामुळे संशयित रुग्णांची संख्यादेखील वाढली आहे. गुरुवारी दिवसभरात जिल्ह्यात एक हजार ३०० संशयित दाखल झाले. यांपैकी ७६७ रुग्ण नाशिक शहरातील, तर ३५२ रुग्ण ग्रामीण भागातील आहेत. मालेगाव महापालिका हद्दीतही १६ संशयित दाखल असून, गृह विलगीकरणात १६५ संशयितांचा समावेश आहे. सायंकाळपर्यंत तब्बल ९४३ अहवाल प्रलंबित होते.  

हेही वाचा > 'या गुन्ह्यातून सुटकेसाठी मी तुझी मदत करतो'...पण त्याच्याबद्दल्यात..

(संपादन - किशोरी वाघ)