नाशिक : कोरोनाच्या दुसऱ्या लाटेत (Corona second wave) झालेली मनुष्यहानी पाहता तिसऱ्या लाटेची (Third wave) शक्यता गृहित धरून जिल्हा परिषदेच्या आरोग्य विभागाकडून आतापासूनच तयारी सुरू झाली आहे. तिसऱ्या लाटेत बालकांना हानी पोहोचू नये, यासाठी विभागाकडून जिल्ह्यातील २० प्राथमिक आरोग्य केंद्रांत २००, तर ३० कोविड केअर सेंटरमध्ये (Covid care centre) ३०० खाटा राखीव ठेवण्यात येणार आहेत.

(Nashik district ready to face the third wave of corona)

आरोग्य विभागाकडून आवश्‍यक ती संपूर्ण तयारी...

कोरोना महामारीच्या (Covid pandemic) दुसऱ्या लाटेत मोठ्या प्रमाणात ग्रामीण भागातील नागरिकांना जीव गमवावा लागला होता. कोरोनाबाधितांची वाढती संख्या पाहता अनेकांना ऑक्सिजनसाठी (Oxygen) वणवण फिरावे लागले. अनेकांना रुग्णालयात बेडही उपलब्ध झाले नाहीत. अनेक रुग्णांचा वेळेवर ऑक्सिजन न मिळाल्याने जीव गेला. यानंतर आता तिसऱ्या लाटेची शक्यता वर्तविली जात आहे. तिसरी लाट आल्यास त्याचा प्रभावीपणे सामना करता यावा आणि रुग्णांची सुविधांअभावी गैरसोय होऊ नये, म्हणून आरोग्य विभागाकडून आतापासून आवश्‍यक ती संपूर्ण तयारी केली जात आहे.

तिसऱ्या लाटेत बालकांना लागण होण्याची शक्यता...

आरोग्य विभागातर्फे जिल्ह्यातील लहवित, सय्यदप्रिंपी, जातेगाव, सोमठाणे, देवपूर, निमगाव, चांदोरी, खडकमाळेगाव, करंजाळी, बुबळी, नांदुरी, वडनेरभैरव, काजीसांगवी, अंजनेरी, न्यायडोंगरी, भारम, तळेगाव दिंडोरी, दहिवड, ताहराबाद आणि कोरपगाव या २० आरोग्य केंद्रांमध्ये प्रत्येकी ३० बेड ऑक्सिजन सुविधेसह तयार करण्यात येणार आहेत. तिसऱ्या लाटेत बालकांना कोरोनाची मोठ्या प्रमाणात लागण होण्याची शक्यता वर्तविली जात असल्याने प्रत्येकी दहा बेड राखीव ठेवले जाणार आहेत.

तिसऱ्या लाटेत औषधांचा पुरेसा साठा जिल्ह्यातील आरोग्य विभागाकडे असावा, या दृष्टीने आरोग्य विभागाकडून कोट्यवधींची औषध खरेदी केली जाणार आहे. त्यास सर्व सदस्यांनी मंजुरी दिली आहे.

(Nashik district ready to face the third wave of corona)