Nashik Drug Case : सामनगावमध्ये मॅफेड्रॉन (एमडी) तस्करी करून सोलापुरात कारखाने व गुदाम चालविणारा ड्रग्जमाफिया सनी पगारे-अर्जुन पिवाल टोळीविरोधातील लावण्यात आलेला ‘मोका’ पोलिस महासंचालक कार्यालयाने फेटाळून लावला आहे. ड्रग्ज टोळीविरोधातील ‘मोका’ पोलिस महासंचालकांनी नामंजूर केला आहे. पगारे-पिवाल टोळीविरोधातील एमडी तस्करीचा गुन्हा कायम असून, या प्रकरणी अद्यापही मुख्य संशयित पोलिसांच्या हाती लागलेला नाही. (Nashik Drug Case Moka on drug mafia pagare piwaltoli rejected )

सप्टेंबर २०२३ मध्ये सामनगाव येथे ड्रग्ज पेडलर्सला अटक केल्यावर शहर गुन्हे शाखेच्या युनिट एकच्या पथकाने या टोळीचा पर्दापाश करीत सोलापुरातील दोन कारखाने उद्‌ध्वस्त केले होते. पगारे-पिवाल टोळीला अटक केली होती. तत्कालीन पोलिस आयुक्त अंकुश शिंदे यांच्या बदलीचे आदेश नोव्हेंबर २०२३ मध्ये आले असता, त्याचवेळी त्यांनी पदभार सोडण्यापूर्वी ड्रग्जतस्करांना दणका देत पगारे-पिवाल टोळीविरोधात ‘मोका’अंतर्गत कारवाई केली होती. (latest marathi news)

यात गणेश शर्मा, गोविंदा साबळे, आतिश ऊर्फ गुड्ड्या चौधरी, सनी व सुमीत हे पगारे बंधू, मनोज गांगुर्डे, अर्जुन पिवाल, भूषण ऊर्फ राजा मोरे, मनोहर काळे, वैजनाथ हावळे, प्रथमेश मानकर, उमेश व अमोल वाघ, अक्षय नाईकवाडे, भूषण मोरे या संशयितांना अटक करण्यात आली होती. ‘मोका’चा तपास तत्कालीन सहाय्यक आयुक्त आनंदा वाघ यांच्याकडे होता. गुन्हे शाखा युनिट एक आणि अमली पदार्थविरोधी पथकाने या टोळीला गजाआड केले होते.

तांत्रिक मुद्द्यांचा अभाव

शरीराविरोधातील गंभीर स्वरूपाचे संघटितपणे गुन्हे असल्यास संशयित टोळीविरोधात ‘मोका’न्वये कारवाई केली जाते; परंतु या गुन्ह्यात शरीराविरोधातील हल्ला, हिंसेसंदर्भातील कोणतेही कलम नसल्याच्या तांत्रिक मुद्द्याअभावी हा ‘मोका’ पोलिस महासंचालक कार्यालयाकडून फेटाळण्यात आल्याचे समजते.