Nashik News : गेल्‍या चार दिवसांपासून सुरू असलेल्‍या वळिवाच्या पावसाने बुधवारी (ता.१५) विश्रांती घेतली. दिवसभर ढगाळ वातावरण राहिले तरी सायंकाळी उशिरापर्यंत पाऊस बरसला नव्‍हता. त्यामुळे पारा पुन्‍हा वाढला असून, कमाल तापमान ३८.३ अंश सेल्सिअसवर नोंदविले गेले. आठ दिवसांपूर्वीपर्यंत नाशिकचे तापमान चाळीस अंश सेल्सिअसच्याही पुढे गेले होते. (Due to heavy rain temperature level droppe)

तप्त उन्‍हाळ्याच्‍या झळा सहन करताना कमालीचा उकाडा नाशिककरांना जाणवत होता. अशातच चार दिवसांपूर्वी झालेल्‍या वळिवाच्‍या पावसामुळे पाऱ्यात घसरण झाली होती. अचानक झालेल्‍या पावसामुळे ठिकठिकाणी तळे साचले असले तरी किमान उकाड्यापासून काही प्रमाणात दिलासा मिळाला होता.

बुधवारीदेखील शहरासह जिल्‍हाभरात ढग दाटलेले होते. हलक्‍या ते मध्यम स्वरूपाच्या पावसासह गारपिटीचा अंदाज हवामान खात्‍याने वर्तविला होता. उत्तर महाराष्ट्र स्‍तरावर दाब निर्माण झाल्‍याने पावसाची शक्‍यता होती. परंतु नाशिक शहरात मात्र सायंकाळी उशिरापर्यंत पाऊस झाला नव्‍हता. (latest marathi news)

पावसाने विश्रांती घेताच तापमानात वाढ नोंदविली गेली आहे. आता पुन्‍हा पार चाळीस अंश सेल्सिअसच्या उंबरठ्यावर पोचला आहे. बुधवारी नाशिकचे कमाल तापमान ३८.३ अंश सेल्सिअस राहिले. कमाल तापमानात वाढ झाली असली तरी किमान तापमानातील घसरण कायम असून, २१.५ अंश सेल्सिअस इतक्‍या किमान तापमानाची नोंद घेण्यात आली आहे.

वाऱ्याच्‍या गतीमध्ये वाढ

ढग दाटलेले असताना, वातावरणात तीव्र वारे वाहत होते. ३० ते ४० किलोमीटर प्रतितास या गतीने वारे वाहत असल्‍याची नोंद हवामान खात्‍याने घेतली होती. वातावरणातील वाऱ्यामुळे उकाड्याची तीव्रता कमी झालेली होती.