नाशिक : अशोकस्तंभ परिसरातील खासगी क्लासेसच्या विद्यार्थ्यांच्या दोन गटात तुफान हाणामारीची घटना घडली. सदरची फ्री-स्टाईल सुरू असतानाच पोलिस गाडी जात असताना त्यांनी सायरन वाजविताच हाणामारी करणार्यांनी पोबारा केला. याप्रकरणी मात्र पोलिसात कोणतीही तक्रार दाखल नव्हती. अशोकस्तंभ परिसरात बहुसंख्येने खासगी क्लासेस आहेत. ( Free style fight on stress among students of 2 groups on Ashoka Stambh )

शनिवारी (ता. ५) सकाळी अकरा वाजेच्या सुमारास अशोकस्तंभ येथील क्लासेसमधून बाहेर पडलेल्या विद्यार्थ्यांच्या दोन टोळक्यांमध्ये अचानक हाणामारी सुरू झाली. दोन-तीन विद्यार्थ्यांवर दुसर्या गटातील आठ-दहा जण तुटून पडले. बघता-बघता गर्दी झाली. यावेळी रस्त्याने जाणार्यांनीही विद्यार्थ्यांना रोखण्याऐवजी मोबाईलवर फोटो व व्हिडिओ काढण्यात धन्यता मानली.

दरम्यान, त्याचवेळी मेहेर सिग्नलकडून अशोकस्तंभाकडे पोलीस वाहन जात होते. रस्त्यावर गर्दी दिसल्याने पोलीस वाहनचालकाने सायरन वाजविताच हाणामारी करणार्या विद्यार्थ्यांनी पोबारा केला. मात्र याप्रकरणी सरकारवाडा पोलिसात रात्री उशिरापर्यंत कोणतीही तक्रार दाखल नव्हती.