बिजोरसे : गौरी गणपती सणाच्या पार्श्वभूमीवर कसमादेपट्ट्यात फूलबाजारात फुलांची मोठ्या प्रमाणावर आवक होऊनही दर चढेच राहिले. येणाऱ्या नवरात्रोत्सवात अशीच स्थिती राहावी. गणेशोत्सवात गौराई पावली. नवरात्रोत्सवातही हेच चित्र राहावे, अशी फूल व्यावसायिकांची अपेक्षा आहे. (Ganapati Gaurai helped flower traders)

साधारणतः मालाची आवक वाढली, की त्याच्या दरात घसरण होते, असे अर्थशास्त्र सांगते. मात्र या सणात फुलांना मोठी मागणी असल्याने फुले, हारही भाव चढेच होते. त्यामुळे यंदाच्या गणेशोत्सवात कसमादेपट्ट्यात फूलविक्रेत्यांना गौराई पावली, असेच चित्र होते.

गणेशोत्सवात फुलांच्या दरात ५० ते ५५ टक्के वाढ झाल्यानंतरही ग्राहकांकडून फुलांना चांगली मागणी होती. एकावेळी मागणी आणि चांगले दरही मिळत असल्याने फूल व्यावसायिकांमध्ये गणेशोत्सवाच्या काळात चैतन्य पाहायला मिळाले.

नवरात्रोत्सव आता काही दिवसांवर येऊन ठेपला आहे. नवरात्रोत्सवात पूजेसाठी फुले लागतात. मुलांना खूप मागणी असते. दसऱ्याच्या दिवशी तर झेंडूचे फुले शेकडोच्या दराने विकली जातात. गणेशोत्सवाप्रमाणे नवरात्रोत्सव भाव राहिले तर शेतकऱ्यांना दोन पैसेही मिळतील.

फुलांचे दर

बाजारात झेंडू, लिली, शेवंती, गुलाब, मोगरा, चमेली, अबोली, कण्हेरी ही फुले हार विक्रीमधून रोज लाखोंची उलाढाल होते. सण, उत्सवकाळात झेंडू, शेवंती या फुलांच्या हारांना मोठी मागणी असते. गेल्या काही दिवसांपासून बाजारपेठेत झेंडू, मोगरा आणि गुलाबांच्या फुलांची आवक वाढली असून, दरही टिकून आहेत. फुलांच्या तुलनेत फुलांपासून बनवलेल्या हारांना वाढीव दर मिळत आहे. (latest marathi news)

"गणेशोत्सवाच्या निमित्ताने फुलांची आवक वाढते. त्याचप्रमाणे दरातही वाढ झाली होती. राज्यात सर्वच भागात सध्या सुधारित शेतकरी फुलांच्या लागवडीकडे विशेष लक्ष देत असल्यामुळे फुलांचा दर्जादेखील सुधारला आहे. त्यामुळेच ग्राहकदेखील आनंदाने खरेदी करत आहेत. नवरात्रोत्सवात असेच चित्र अपेक्षित आहे."- रामनाथ पाटील, फूलविक्रेते शेतकरी

फुले दर

गुलाब १०० रुपये १० नग

कमळ २० रुपये प्रतिनग

मोगरा ५ रुपये प्रतिनग मोगरा

किलोचे दर

मोगरा ७०० रुपये

झेंडू १५० ते १६० रुपये

शेवंती ३०० रुपये किलो