Nashik News : युनियन बँकेच्या मनमाड येथील शाखेत ग्राहकांच्या नावे बनावट मुदत ठेवी ठेवल्याचा प्रकार उघडकीस आल्यानंतर बँकेच्या वरिष्ठ अधिकाऱ्यांनी याप्रकरणी कार्यवाही सुरु केली आहे. त्यानंतर बँकेतर्फे गुरुवारी (ता. ३०) चार ग्राहकांना व्याजासह सर्व पैशांचा परतावा केला असून, लवकरात लवकर फसवणूक झालेल्या सर्व ग्राहकांना पैशांचा योग्य परतावा करण्याचा विश्‍वास बँकेच्या अधिकाऱ्यांनी व्यक्त केला. (Customer refund from Union Bank)

मनमाड शहरातील युनियन बँक ऑफ इंडियाच्या शाखेत अधिकारी असल्याचे भासवून काही व्यक्तींनी ग्राहकांची फसवणूक केली. बँकेचा त्यांच्या व्यवहारांशी संबंध नसतानाही हा प्रकार घडल्यामुळे युनियन बँकेच्या अधिकाऱ्यांनी तातडीने याबाबत ‘ॲक्शन’ घेत चार अधिकारी व कर्मचाऱ्यांना तडकाफडकी निलंबित करून ग्राहकांना पैसे देण्यास सुरवात केली. (latest marathi news)

चार ग्राहकांना व्याजासह पैसेही मिळाल्यामुळे त्यांनी बँकेविषयी सकारात्मक भावना व्यक्त केली आहे. सर्व ग्राहकांना बँकेच्या नियमांनुसार योग्य तो परतावा लवकरात लवकर दिला जाईल. त्यामुळे कुणीही घाबरून जाऊ नये, असे आवाहन बँकेच्या अधिकाऱ्यांनी केले.