वावी : सिन्नरमधील महसूल, पंचायत समिती, दुय्यम निबंधक, भूमी अभिलेख, शिक्षण विभाग, पालिका, अशा विविध कार्यालयांतील सुमारे १० लाखांहून अधिक दस्तांची तपासणी केल्यानंतर तालुक्यात १५ हजार ५७१ कुणबीच्या नोंदी प्रशासनाला आढळल्या आहेत.

यातील बहुतेक कुटुंबांनी कुणबी जातीचे प्रमाणपत्र महसूल विभागाकडून प्राप्त केले आहे. (Nashik Maratha community Survey 15571 Kunbi records in Sinnar taluka Instructions to complete survey by 31)

दरम्यान, मराठा समाजाचे सामाजिक, आर्थिक, शैक्षणिक मागासलेपण तपासण्यासाठी सिन्नर तालुक्यातील १२८ गावांमधील अचूक सर्वेक्षण करण्यासाठी तहसीलदार सुरेंद्र देशमुख यांच्या नेतृत्वाखाली ४०३ प्रगणकांची नेमणूक केली आहे.

त्यांच्यावर २७ पर्यवेक्षक निगराणी ठेवणार आहेत. २३ ते ३१ दरम्यान नऊ दिवसांत सर्वेक्षण पूर्ण करून त्याचा अहवाल शासनाला सादर करण्यात येणार आहे.

जिल्हा परिषदेच्या ४०३ शिक्षकांची प्रगणक म्हणून, तर ग्रामसेवक, कृषी सहायक, तलाठी, अशा २७ जणांची पर्यवेक्षक म्हणून नियुक्ती केली आहे.

गेल्या आठवड्यात तहसीलदार सुरेंद्र देशमुख यांच्या उपस्थितीत सिन्नर पंचायत समितीच्या सभागृहात प्रगणक आणि पर्यवेक्षकांना सर्वेक्षणाचे प्रशिक्षण देण्यात आले.

सर्वच कुटुंबाचे सर्वेक्षण होणार असून, आरक्षण असलेल्या कुटुंबांच्या जातीचा ॲपमध्ये उल्लेख करताच त्या कुटुंबाचे सर्वेक्षण तिथेच थांबेल. उर्वरित मराठा आणि इतर आरक्षण नसलेल्या कुटुंबांच्या सर्वेक्षणाचा फॉर्म प्रगणकांना शेवटपर्यंत भरावा लागणार आहे.

नागरिकांनी त्यांना योग्य माहिती देऊन या सर्वेक्षणासाठी सहकार्य करावे असे आवाहन तहसीलदार श्री. देशमुख यांनी केले आहे.

असे होईल सर्वेक्षण

गोखले इन्स्टिट्यूट ऑफ पॉलिटिक्स ॲन्ड इकॉनॉमिक्स संस्थेने डेव्हलप केलेले ॲप प्रत्येक प्रगणकाच्या‌ मोबाइलमध्ये इन्स्टॉल केले आहे. प्रगणक घरोघरी जाऊन ॲपमध्ये असलेला ३२ पानांचा फॉर्म भरून घेतील.

त्यात कुटुंबाची मूलभूत, आर्थिक, सामाजिक, शैक्षणिक आणि आरोग्य विषयकमाहिती भरावयाची आहे. १८२ प्रश्नांची प्रश्नावली ॲपमध्ये आहे.

शिवाय कागदी फार्मही प्रगणकाजवळ आहेत. फॉर्म अंतिम झाल्यानंतर त्यावर कुटुंबातील सदस्याने माहिती दिली त्याची स्वाक्षरी घेऊन ती स्कॅन करून ॲपमध्ये अपलोड करणार आहे.