नाशिक : नाशिक कृषी उत्पन्न बाजार समितीची निवडणूक १५ मार्च २०२३ पर्यंत लांबणीवर टाकण्याचे आदेश मुंबई उच्च न्यायालयाने दिले आहेत. या निर्णयामुळे बाजार समितीची निवडणूक साडेतीन महिने लांबणीवर पडली आहे. याबाबत, सहकार प्राधिकरणाकडून अधिकृतपणे पत्र प्राप्त झालेले नाही. मात्र, बाजार समिती प्रशासनाकडून यास दुजोरा देण्यात आला आहे. (Nashik Market Committee Election Postponed till 15 march Nashik News)

हेही वाचा : ज्ञानेश्वरीत आहेत HR निगडित व्यवस्थापन सूत्रे...

नाशिक बाजार समितीच्या निवडणुकीसाठी अंतिम मतदार यादी प्रसिध्द करण्यात आली होती. २९ जानेवारीला मतदान होणार होते. दरम्यान, जिल्हयातील १९६ ग्रामपंचायतींच्या निवडणुका जाहीर झाल्या असून त्यासाठी उद्या (ता.१८) मतदान होत आहे. यातील नाशिक बाजार समितीच्या कार्यक्षेत्रातील तीन तालुक्यांतील १२ ग्रामपंचायतींच्या निवडणुका होत आहेत. याशिवाय विनायक माळेकर, बहिरू मुळाणे, युवराज कोठुळे यांनी पेठमधील ७१, नाशिकमधील १८ तर, त्र्यंबकेश्वरमधील ५८ अशा एकूण १४७ ग्रामपंचायतींच्या निवडणुका होऊन देखील त्या ग्रामपंचायत सदस्यांची नावे मतदार यादीत नसल्याची हरकत नोंदविली होती.

याबाबत सदानंद नवले यांनी यांनी मुंबई उच्च न्यायालयात याचिका दाखल केली होती. तिच्यावर सुनावणी झाली. यामध्ये नाशिक बाजार समितीची निवडणूक १५ मार्चनंतर घेण्याचे आदेश देण्यात आले आहेत. या आदेशामुळे या बाजार समितीच्या कार्यक्षेत्रातील १४७ ग्रामपंचायतींमधील सुमारे एक ते दीड हजारांपेक्षा जास्त नवनिर्वाचित सदस्यांना बाजार समितीच्या मतदान प्रक्रियेत सहभागी होण्याचा अधिकार प्राप्त होणार आहे.