मालेगाव : मालेगाव शहरातील रहिवासी असल्याचे भासविण्यासाठी बनावट कागदपत्रे तयार करून भारतात बेकायदेशीररीत्या प्रवेश केल्याचा आरोप सिद्ध झाल्याने आलम आमीन अन्सारी (रा. हजारखोली) व ताहीर अली युसूफ अली (रा. शाही गोल्डन हॉटेलच्या पाठीमागे) या दोघा बांगलादेशी नागरिकांना येथील जिल्हा व अपर सत्र न्यायालयाचे न्यायाधीश डी. डी. कुरुलकर यांनी दोन वर्षे सश्रम कारावास व दोघांना दोन हजार रुपये दंडाची शिक्षा सुनावली. दंड न भरल्यास आठ दिवस अधिक सश्रम कारावासाची शिक्षा भोगावी लागणार आहे.

ताहीर अली युसूफ अली (रा. गोल्डननगर) व आलम आमीन अन्सारी (दोघे रा. नैकुलसूरी, जि. बांदरबन, बांगलादेश, हल्ली रा. हजारखोली, मालेगाव) हे दोघेही १ ऑक्टोबर २०२० ते ६ नोव्हेंबर २०२० पर्यंत शहरात राहत होते. त्यांनी इतरांच्या मदतीने खोटा जन्मदाखला तयार करून महापालिकेच्या अधिकाऱ्यांच्या बनावट सह्या केल्या. आधारकार्ड, पॅनकार्ड, बँक खाते पासबुक, रेशन कार्ड व इतर बनावट कागदपत्रे तयार करून ती खरे असल्याचे दाखविले. मालेगाव शहरातील रहिवासी असल्याचे भासवून पासपोर्ट तयार केला.

बांगलादेशी नागरिक असल्याची माहिती लपवून ठेवली. दोघांसह इतर दहा जणांविरुद्ध पवारवाडी पोलिस ठाण्यात गुन्हा दाखल झाला आहे. आलम अन्सारी याच्यासह अकरा जणांविरुद्ध आयेशानगर पोलिस ठाण्यात गुन्हा दाखल करण्यात आला होता. दोन्ही खटल्याचे कामकाज नुकतेच न्यायालयात चालले. दरम्यानच्या काळात खटल्याचे कामकाज सुरू असताना दोघांनी न्यायालयापुढे बांगलादेशी नागरिक असल्याचे व बेकायदेशीररीत्या भारतात प्रवेश केल्याचे कबूल केले होते.

अतिरिक्त सरकारी वकील ॲडव्होकेट संजय सोनवणे यांनी सरकार पक्षातर्फे कामकाज पाहिले. आरोप सिद्ध झाल्याने न्यायालयाने दोघांना वरीलप्रमाणे शिक्षा ठोठावली. इतर संशयित आरोपींबाबतचा खटला प्रलंबित आहे.