Nashik NMC News : वारंवार नोटीस बजावूनही महापालिकेकडे थकबाकी अदा ना करणाऱ्या ६४१ थकबाकीदारांच्या नळजोडण्या खंडित करत थकबाकीदार विरोधात कर विभागाने जोरदार मोहीम उघडली आहे. यंदा महापालिकेने घरपट्टीमध्ये २०६ कोटी रुपयांची वसुली केली आहे. मागील काही वर्षात सर्वाधिक वसुली झाली आहे. पाणीपट्टीचीदेखील ५४ कोटी रुपयांची वसुली झाली आहे. मात्र पाणीपट्टी वसुली ही सरासरी आहे. (Nashik NMC News)

विविध कर विभागाला ७५ कोटी रुपयांचे उद्दिष्ट निश्चित करण्यात आले होते. त्यापैकी ५४ कोटी रुपये वसुली झाली. जानेवारी महिन्यात पाणीपट्टीची अपेक्षित वसुली होत नसल्याने कर विभागाने थकबाकीदांराविरोधात मोहीम उघडली. शहरात २ लाख ७ हजार नळजोडण्या आहेत. त्यातील ४४ हजार ३८५ नळजोडणी धारकांकडे ९५.७५ कोटी रुपयांची थकबाकी आहे.

त्यामुळे फेब्रुवारी महिन्याच्या पहिल्या आठवड्यात थकबाकीदारांना नोटीस बजावण्यात आल्या. त्यानंतर नोटीस देऊनही अपेक्षित वसुली होत नसल्याने २२ फेब्रुवारीपासून मोठ्या थकबाकीदारांविरोधात मोहीम सुरू करण्यात आली. मोहिमेसाठी संयुक्त पथके तयार करण्यात आली. पथकांच्या माध्यमातून ६४१ थकबाकीदारांच्या नळजोडणी खंडित करण्यात आल्या. (latest marathi news)

थकबाकी अदा केल्यानंतर नळजोडण्या पूर्ववत केल्या जाणार असून, परस्पर नळजोडणी केल्यास फौजदारी गुन्हे दाखल केले जाणार असल्याची माहिती पाणीपुरवठा विभागाचे अधीक्षक अभियंता संजय अग्रवाल यांनी दिली.

अशी झाली कारवाई

विभाग खंडित नळजोडणी संख्या

सिडको २९८

सातपूर १३३

नाशिक रोड ११४

पंचवटी ८२

पूर्व ८

पश्चिम ६