जुने नाशिक : महापालिका जीपीओ जलकुंभ आवारात स्मार्टसिटीअंतर्गत सीसीटीव्ही बसविण्यात आले आहे. कॅमेरे सुरू नसल्याने ते केवळ शोभेच्या वस्तू ठरत आहे. परिसरात मद्यपी आणि टवाळखोरांचा वावर दैनंदिन वाढतच आहे. आवरास एका बाजूस संरक्षण भिंतच नसून अन्य तीन भागांच्या भिंतींचीही दुरावस्था झाली आहे. त्यामुळे जलकुंभ आणि आवार रामभरोसे आहे. (Nashik GPO Jalkumbh premises CCTV of no use building)

जलकुंभ परिसर प्रतिबंधक क्षेत्र म्हणून घोषित करण्यात आला आहे. त्या आशयाचा फलकदेखील लावला आहे. काही दिवसांपूर्वी जलकुंभ सुरक्षा कारणास्तव स्मार्टसिटी अंतर्गत जलकुंभ आवारात सीसीटीव्ही लावण्यात आले आहे. फलक आणि कॅमेरे दोघांनाही तिलांजली देत जलकुंभ आवारात सर्रास टवाळखोरांचा वावर दिसून येत आहे.

जुगाराचे डाव, मद्याच्या पार्ट्या सुरू आहेत. याकडे लक्ष नसल्याने आवार रामभरोसे असल्याचे भासत आहे. दिवसेंदिवस जीपीओ जलकुंभ आवाराची दुरावस्था होत आहे. जलकुंभ आवारातील मंदिर परिसरात जुगारीचे डाव रंगत आहे. त्याचप्रमाणे टवाळखोर रस्त्यावरील भिकारी आवारात प्रवेश करून नशा करताना अनेकदा दिसून येत आहे. (latest marathi news)

ठिकठिकाणी कचरा जाळून परिसरातील नागरिकांचा जीव धोक्यात घातला जात आहे. प्रतिबंधक क्षेत्र म्हणून आवार नावालाच राहिला आहे. त्याचप्रमाणे येथील स्वच्छतेकडे दुर्लक्ष झाल्याने संपूर्ण आवारात कचरा पडून आहे. संरक्षण भिंत नसल्याने नागरिकही आवारात कचरा फेकत आहे.

त्यामुळे दुर्गंधी वाढली आहे. पाणीपुरवठा करणाऱ्या व्हॉलच्या खड्ड्यांमध्ये कचरा कुजून अधिक प्रमाणात दुर्गंधी पसरत आहे. बऱ्याच वेळा पाइपलाइनमधून दूषित पाणीपुरवठा होण्याच्या घटना घडत आहे. महापालिकेकडून याकडे लक्ष देत आवाराची स्वच्छता करावी. टवाळखोर आणि भिकाऱ्यांना आवारात येण्यास प्रतिबंध करावा, सीसीटीव्ही कार्यान्वित करण्यात यावे, अशी मागणी होत आहे.