Nashik Onion Auction : लेव्हीच्या मुद्यावरुन जिल्ह्यातील बाजार समितीतील कांदा खरेदी विक्री व्यवहाराला लागलेले ग्रहण अखेर सुटले असून दिंडोरी कृषी उत्पन्न बाजार समितीत कांदा खरेदी-विक्री व्यवहार प्रणाली पूर्ववत सुरु झाल्याने शेतकरी वर्गाकडून याचे स्वागत केले जात आहे. लेव्हीच्या मुद्यावरुन गेल्या काही दिवसांपासून जिल्ह्यातील बाजार समित्यांतील कांदा खरेदी-विक्री बंद होती. (Nashik Onion auction cancelled in Dindori Bazar Committee marathi news)

त्यानंतर व्यापाऱ्यांनी खासगी जागेत कांदा मार्केट तीन-चार दिवसांपासून सुरु केल्याने त्या ठिकाणी कडकडीत ऊन व निवारा शेड अभावी कांदा विक्रेते व व्यापारी यांना उन्हाच्या तीव्रतेचा सामना करावा लागला. दिंडोरी कृषी उत्पन्न बाजार समिती सभापती प्रशांत कड, उपसभापती कैलास मवाळ यांनी ही बाब गांभीर्याने घेत संचालक मंडळाची तातडीने बैठक घेत शेतकरी हितासाठी बाजार समितीच्या बाजार आवारातच कांदा खरेदी विक्रीचा निर्णय घेत संबंधित व्यापाऱ्यांना लेव्ही, आडतची कपात न करता माल खरेदीच्या सूचना करीत संचालक मंडळाच्या ठरावाचे पत्र दिले. (latest marathi news)

तसेच शेतकऱ्यांनाही कांदा विक्रीसाठी बाजार समितीत आणण्याचे आवाहन करीत सोमवार (ता.१५) पासून बाजार समितीच्या कार्यक्षेत्रात कांदा खरेदी विक्री व्यवहार सुरु केले. लेव्हीचा निर्णय प्रलंबित असून शासन निर्णयानुसार त्याबाबत कार्यवाहीचा प्रतिक्षा असून तोपर्यंत शेतकरी व्यापारी व बाजार समिती यांची भूमिका समन्वयाची असून शेतकरी हित डोळ्यासमोर ठेऊन हा निर्णय घेतल्याची माहिती बाजार समितीचे सभापती कड यांनी दिली.

कांद्यास १३०० ते १६०० रुपये बाजारभाव मिळाल्याने शेतकऱ्यांनी समाधान व्यक्त केले आहे. दिंडोरी कृषी उत्पन्न बाजार समितीच्या दिंडोरी व वणी येथील कांदा खरेदी विक्रीचे व्यवहार सुरु असून शेतकऱ्यांनी आपला कांदा विक्रीस आणण्याचे आवाहन समितीने केले आहे.