Ramadan Eid 2024 : चाँद नजर आ गया... रोजे रखने वालो की है ईद, ईद मुबारक आयी है ईद’ गीताचा प्रत्यय आणून देणारे वातावरण बुधवारी (ता.१०) सायंकाळी अनुभवावयास मिळाले. सायंकाळी चंद्रदर्शन घडताच चाँद नजर आ गया, ईद मुबारक’ असे म्हणत एकमेकांना शुभेच्छा दिल्या. तर दुसरीकडे किरकोळ खरेदीसाठी बाजारात गर्दी उसळलेली दिसून आली. चंद्र दर्शनाकडे मुस्लिम बांधवांच्या नजरा लागू होत्या. (nashik Ramadan Eid will be celebrated today marathi news)

मंगळवारी (ता.९) रमजान महिन्याची उर्दू २९ तारीख असल्याने चंद्रदर्शन घडण्याची शक्यता होती. मात्र तसे झाले नाही. राज्यासह देशात कुठेही चंद्रदर्शन घडले नाही. त्यामुळे मुस्लिम बांधवांना आणखी एक रोजा करण्यास मिळाल्याने त्यांच्यात उत्साहाचे वातावरण होते. बुधवारी (ता.१०) सायंकाळी चंद्रदर्शन घडले. गुरुवारी (ता.११) रोजी रमजान ईद साजरी होणार असल्याची घोषणा चाँद कमिटीचे अध्यक्ष तसेच शहर-ए-खतीब हीसामोद्दीन खतीब यांनी केली.

त्यांच्या अध्यक्षतेत शहरातील मौलवींची शाही मशीद येथे झालेल्या बैठकीत सर्वानुमते निर्णय घेतला. गुरुवारी सकाळी १० वाजता ईदची नमाज होणार असल्याचे यावेळी सांगण्यात आले. त्यानिमित्त ईदगाह मशीद आणि मैदानाची मुस्लिम बांधव तसेच चाँद कमिटीचे सदस्य यांनी पाहणी केली. तर दुसरीकडे ईदसाठी आवश्यक किरकोळ खरेदीसाठी मुस्लिम बांधवांनी बाजारपेठेत गर्दी केली होती.(latest marathi news)

दूध बाजार ते फाळके रोड, फाळके रोड ते चौक मंडई, बागवान पुरा, वडाळा रोड भागात रात्री उशिरापर्यंत खरेदी-विक्री सुरू होती. दर्गा, मशीद तसेच घरांवर, चौका-चौकात आकर्षक विद्युत रोषणाई केली होती. सोशल मीडिया आणि प्रत्यक्षरीत्या मुस्लिम बांधवांनी एकमेकांना, चाँद मुबारक, ईद मुबारक शुभेच्छा दिल्या.

पोलिसांकडून मैदानाचा ताबा

सुरक्षितता कारणास्तव पोलिसांकडून रमजान ईदच्या चोख बंदोबस्ताचे नियोजन करण्यात आले आहे. वाहतूक मार्गातही बदल केले आहेत. ईदगाह मैदानावर हजारोंच्या संख्येने मुस्लिम बांधव नमाजसाठी येत असल्याने कुठलाही अनुचित प्रकार घडू नये, यासाठी पोलिसांनी मैदानाचा ताबा घेतला आहे.

वाहतुकीसाठी बंद

ईदगाह मैदान इतर दिवसांत वाहतुकीसाठीही खुले असते. दुचाकी, चारचाकी वाहनधारक वाहतूक कोंडीपासून बचावासाठी या मधल्या मार्गाचा अवलंब करतात. पादचारीही या मार्गाचा वापर करत असल्याने वाहनधारक आणि नागरिकांना रस्ता सोयीचा ठरतो. त्यांच्या वेळेचीही बचत होते. मात्र ईद निमित्त सपाटीकरण केल्याने मैदानास वाहनांमुळे पुन्हा खड्डे पडू नये, यासाठी ईदच्या नमाजपर्यंत मैदान वाहतुकीसाठी बंद केले आहे.