सिडको : खांडेनगर परिसर गेल्या ५-६ वर्षात कुठल्याही प्रकारचा विकसित झालेला आहे. मात्र दोन्ही प्रभागांचा भाग असल्यामुळे जवळपास कोणतेही नगरसेवक या भागात शक्यतो फिरकत सुद्धा नाही.

कसलाच विकास निधी उपलब्ध येथे होत नाही. गार्डन किंवा नाना- नानी पार्क येथे अजून तयार झालेला नाही. येथील रस्त्यांपेक्षा खेड्यातील रस्ते बरे असे म्हटल्यास वावगे ठरणार नाही. (Nashik Road Damage Daily death due to road problem Khandenagar area awaits development)

खांडेनगर परिसरात २०१७ मध्ये नागरिकांनी रस्त्यांचा मुद्दा उचलून धरला होता. त्या वेळी प्रशासनाने तत्काळ पुढील ३ महिन्यात नवीन रस्ते मंजूर करून रस्ते बांधणी सुरू केली होती. मात्र या घटनेला ६ वर्षाचा काळ लोटला गेला.

सध्या खांडेनगर परिसरात रस्त्यांची अवस्था अतिशय बिकट झाली आहे. ज्येष्ठ नागरिक, लहान मुले, महिला या सर्वांनाच रस्त्यावरील खड्ड्यांमुळे अपघाताला सामोरे जावे लागत आहे. त्याचप्रमाणे खड्ड्यांमधील जुनी खडी, दगड वर आल्यामुळे अपघातांचे प्रमाण अधिक झाले आहे.

पावसाळ्यात चिखल आणि खड्ड्यांमध्ये पाणी साचते. पावसाळ्यानंतर धुळीचे साम्राज्य पसरते. अशा सर्वच बाजूने खांडेनगरचे रस्ते पूर्णतः डॅमेज झालेले असताना स्थानिक नागरिकांना श्वसन विकार होण्यास सुरवात झाली आहे.

त्यामुळे याकडे नाशिक महापालिका आयुक्तांनी लक्ष घालून रस्ते दुरुस्ती करावे, अशी मागणी नागरिक करू लागले आहेत.

"खांडेनगर परिसरामध्ये विकासाची वानवा दिसून येते. येथे कोणीही फिरण्यास तयार नाही. नागरिकांना वाऱ्यावर सोडण्यात आले आहे. दिवाळीनंतर खांडेनगर परिसरातील रस्ते दुरुस्ती मनपा प्रशासनातर्फे झाले नाहीतर आंदोलन करण्यात येईल."

- प्रा. अमोल पाटील, प्रदेश सरचिटणीस, राष्ट्रवादी विद्यार्थी काँग्रेस