नाशिक : नाशिक शहर आणि परिसरात मागच्या तीन दिवसांपासून जोरदार पावसाने हजेरी लावल्याने गोदावरीला पूर आला आहे. या पुरामुळे गोदावरीतील दुतोंड्या मारूतीच्या छातीपर्यंत पाणी आले असून गंगापूर धरणातून ५,८८४ क्युसेकने पाणी सोडल्यामुळे नदीच्या पाणीपातळीत अजून वाढ होण्याची शक्यता आहे. त्याचबरोबर रामकुंड परिसरातील अनेक मंदिरे पाण्याखाली गेले आहेत.

(Nashik Flood Latest Updates)

मागच्या तीन दिवसांपासून उत्तर महाराष्ट्रात पावसाने हजेरी लावली आहे. त्यामुळे गोदावरीला पूर आला असून नदीकाठच्या नागरिकांना सतर्कतेचा इशारा देण्यात आला आहे. दरम्यान शहरात आज सकाळपासून काही काळ पावसाने ऊसंत घेतली आहे. तर गोदावरीच्या पुरामुळे नाशिकमधील अनेक मंदिरे पाण्याखाली गेली आहेत.

काल सिन्नर तालुक्यात ढगफुटीसदृश्य पाऊस पडला असून या पावसामुळे अनेक शेतकऱ्यांचे नुकसान झाले आहे. बाजारपेठेत पाणी घुसल्यामुळे सिन्नरमध्ये काही लोकं अडकून पडले होते. त्यांना प्रशासनाकडून बाहेर काढण्यात आले आहे. त्याचबरोबर राज्यातील विविध ठिकाणी मागच्या तीन दिवसांत पावसाने हजेरी लावली होती.