Nashik News : महापालिका शाळांमधील १ लाख १४ हजार ८९५ विद्यार्थ्यांना शाळेच्या पहिल्या दिवशी पाठ्यपुस्तकांचे वितरण केले जाणार असल्याची माहिती शिक्षणाधिकारी बी. टी. पाटील यांनी दिली. सरकारी शाळांमध्ये गळतीचे प्रमाण कमी होऊन शंभर टक्के उपस्थिती राहण्याच्या दृष्टीने शासनाच्या वतीने सर्व शिक्षा अभियानांतर्गत मोफत गणवेश व पाठ्यपुस्तक पुरविले जातात. स्थानिक स्वराज्य संस्था तसेच खासगी अनुदानित शाळांमध्ये पहिली ते आठवीच्या सर्व विद्यार्थ्यांना मोफत पाठ्यपुस्तके देण्याची योजना आहे. (nashik Textbooks to students on first day of school )

महापालिकेच्या शिक्षण विभागाकडूनदेखील पहिली ते आठवीपर्यंतच्या सर्व शाळा तसेच खासगी अनुदानित अशा एकूण ३०४ शाळांमध्ये पाठ्यपुस्तक दिले जाणार आहेत. १ लाख १४ हजार ८९५ पुस्तके संचांची मागणी महाराष्ट्र प्राथमिक शिक्षण परिषदेकडे यापूर्वी नोंदविण्यात आली होती. मराठी माध्यमाच्या २६६, उर्दू माध्यमाच्या २४, हिंदी माध्यमाच्या ८, इंग्रजी माध्यमाच्या ४ तर गुजराती माध्यमाच्या २ शाळांमधील विद्यार्थ्यांचा यात समावेश आहे.

शिक्षण विभागाला महाराष्ट्र प्राथमिक शिक्षण परिषदेकडून पाठ्यपुस्तक प्राप्त झाली आहेत. त्यानुसार शाळानिहाय पाठ्यपुस्तकांचे वाटप सुरू करण्यात आले आहे. त्यामुळे शाळेच्या पहिल्याच दिवशी विद्यार्थ्यांना पाठ्यपुस्तके मिळतील.

''सर्व शिक्षा अभियानांतर्गत सरकारी तसे अनुदानित अशा ३०४ शाळांमधील विद्यार्थ्यांना पहिल्याच दिवशी मोफत पाठ्यपुस्तके दिली जाणार असून त्याचे नियोजन करण्यात आले आहे.''- बी. टी. पाटील, शिक्षणाधिकारी, महापालिका.

माध्यमनिहाय विद्यार्थी संख्या

मराठी- १,०१७३४

हिंदी- २,८१८

उर्दू- ७,८८३

इंग्रजी- १,९९५

गुजराती- ४६५

इयत्तानिहाय पाठ्यपुस्तके

पहिली - ११,९७७

दुसरी - १३,००५

तिसरी - १४६३५

चौथी - १५,३३९

पाचवी - १४,५६३

सहावी - १४,८२३

सातवी - १५,०९५

आठवी - १५,४५८