सुरगाणा : तालुक्यातील आंबुपाडा, बेडसे, ठाणगाव गुरूटेंभी, झगडपाडा, खोकरविहीर, कोडीपाडा, हस्ते, जाहुले या गावांना सोमवारी (ता. १५) दुपारी तीन ते सव्वातीनच्या सुमारास जोरदार चक्रीवादळासह अवकाळी पावसाने एक ते दीड तास हजेरी लावली. यात काही घरांसह आंबा बागांचे मोठ्या प्रमाणावर नुकसान झाले आहे. झगडपाडा येथील चिंतामण त्र्यंबक घांगळे यांच्या घरावरील पत्रे उडाले. काहींच्या घरावरील कौलांचे नुकसान झाले आहे. (Nashik Unseasonal Rain Damage Surgana taluka)

तुळशीराम जाधव, युवराज घांगळे , हिरामण महाले यांच्या घराचे नुकसान झाले, तर झगडपाडा येथील शेतकरी प्रकाश घांगळे, देवराम राऊत, जयराम घांगळे, हिरामण महाले, कोडीपाडा येथील शेतकरी कांतिलाल गावित, राकेश मौळे, विठ्ठल गावित, वसंत गवळी, हिरामण गावित, पांडुरंग गावित, जाणू चौधरी, हंसराज महाले, जनार्दन गावित, चंद्रकांत गावित, तर आंबुपाडा येथील यशवंत वाघमारे, जगदीश पवार, दत्तू वाघमारे, सीताबाई हाडळ, आंबू डगळे यांच्या आंबा बागेचे नुकसान झाले आहे. पुंजा मिरगे, सुकर वार्डे यांच्या घरांचे मोठ्या प्रमाणात नुकसान झाले आहे. इतर शेतकऱ्यांच्या आंबा बागेचे नुकसान झाले आहे.  (latest marathi news)

"कोडीपाडा गावातील शेतात ३५ ते ४० केशर, हापूस, राजापुरी आंबे आहेत. मला दरवर्षी ९० हजार ते सव्वा लाखाचे उत्पन्न मिळत होते. या वर्षी अवकाळी पावसासह चक्रीवादळ झाल्याने खूप नुकसान झाले आहे. त्याचा तातडीने पंचनामा करून नुकसानभरपाई मिळावी."

-चंद्रकांत गावित, शेतकरी, कोडीपाडा