Nashik News : इगतपुरी तालुक्यात सात मोठी धरणे आहेत. मात्र, यावर्षी सातही धरणांनी अक्षरशः तळ गाठला आहे. त्यामुळे जून महिन्यात पाऊस पडला नाही तर पाणीटंचाईला सामोरे जावे लागणार आहे. सात मोठे जलप्रकल्प असलेल्या इगतपुरी तालुक्यात उन्हाळ्याच्या अखेरच्या टप्प्यात १५ टँकरद्वारे एकूण १६ गावे व ४८ वाड्यांना पिण्याचे पाणी पुरवले जात आहे.

धरणांच्या तालुक्यातच तसेच अर्ध्या महाराष्ट्राला पाणीपुरवठा करणाऱ्या तालुक्यातील वाड्या- पाड्यांना टँकरद्वारे पाणीपुरवठा करावा लागत आहे. कुठे गेल्या शासनाच्या जलजीवन योजना, आणि कधी येणार नळाद्वारे घरापर्यंत पाणी असा सवाल आदिवासी वाड्या-पाड्यांतील महिला उपस्थित करीत आहे. ‘हर घर नल का जल’ हीच का सरकारची जलजीवन मिशन योजना, असा प्रश्‍न आहे.

इगतपुरी तालुक्यातील भावली, भाम, दारणा, कडवा व वाकी या धरणांमध्ये शून्य टक्के पाणीसाठा असून, धरणालगतच्या गावांनाच पिण्याच्या पाण्यापासून वंचित रहावे लागत आहे. आता मृत साठ्यावर येथील जलाशयाची मदार आहे. तर भावली धरणात अवघा शून्य टक्के साठा शिल्लक राहिल्याने पावसाला विलंब झाला तर तालुक्यातील अनेक गावांची चिंता वाढण्याची शक्यता आहे.

भाम धरणालगत असलेल्या मांजरगावच्या दोन वाड्या, भरवज, निरपनची वाडी, काळूस्तेची दरेवाडी, त्रिंगलवाडीचा बंधारा रिकामा झाल्याने त्रिंगलवाडीसह पाच वाड्यांना, तसेच वाकी धरणालगत असलेल्या वाळविहीर परिसरातील सहा वाड्यांना टँकरद्वारे पाणीपुरवठा करावा लागत आहे. (latest marathi news)

खैरगावच्या दोन वाड्या, शेवगेडांग दोन वाड्या, कुरुंगवाडीची एक वाडी, आंबेवाडीच्या दोन वाड्या, बलायदुरीची एक वाडी, वासाळीची एक वाडी, आवळखेड, बळवंतवाडी तसेच गरुडेश्‍वरच्या चार वाड्या, मायदरासह दोन वाड्या, खेडच्या दहा वाड्यांना टँकरद्वारे पाणीपुरवठा सुरू करण्यात आला आहे.

हंडेमुक्त गाव घोषणा कागदावरच

इगतपुरी तालुक्यात १५ टँकरद्वारे ४१ फेऱ्यांच्या माध्यमातून १६ गावे व ४८ वाड्यांना पिण्याचे पाणी पुरविले जाते असल्याची माहिती प्रशासनाने दिली. दरम्यान, दरवर्षी यातील बहुतांश वाड्या-पाड्यांना टँकरद्वारे पाणीपुरवठा केला जातो. त्यामुळे टँकरमुक्त तालुका व हंडामुक्त गावे ही घोषणा कागदावर आहे. या वाड्या-पाड्यांना जलजीवन योजनेच्या माध्यमातून कायमस्वरूपी योजना राबविण्यासाठी लोकप्रतिनिधी व अधिकाऱ्यांनी सकारात्मक पुढाकार घेणे अपेक्षित आहे.

धरणांतील साठा (टक्केवारीत)

दारणा : १९.२१

कडवा : ०

मुकणे : १०.८७

भावली : ०

वाकी : ०

भाम : ०