Nashik News : जिल्हा परिषदेतर्फे राबविण्यात येत असलेल्या ‘सुपर ५०’ या उपक्रमासाठी विद्यार्थ्यांना ऑनलाइन प्रवेश अर्ज सादर करण्यास १५ जुलैपर्यंत मुदतवाढ देण्यात आली आहे. आतापर्यंत जिल्ह्यातील पाच हजार ७०० विद्यार्थ्यांनी नोंदणी झाली आहे. यंदा दहा हजार विद्यार्थ्यांचे नोंदणीचे उद्दिष्ट ठेवले आहे. ग्रामीण भागातील विद्यार्थ्यांनी यामध्ये जास्तीत जास्त सहभागी होण्याचे आवाहन जिल्हा परिषदेच्या मुख्य कार्यकारी अधिकारी आशिमा मित्तल यांनी केले. (ZP Registration of 5 thousand 700 students in Super 50 initiative)

मित्तल यांनी गुरुवारी (ता. ११) पत्रकार परिषद घेऊन यंदाच्या नियोजनाची माहिती दिली. अतिरिक्त मुख्य कार्यकारी अधिकारी डॉ. अर्जुन गुंडे उपस्थित होते. शैक्षणिक वर्ष २०२४-२५ व २०२५-२६ या दोन वर्षांसाठी या उपक्रमास एकूण ११० विद्यार्थ्यांची (५५ ‘जेईई’ व ५५ ‘नीट’) उपक्रमाच्या निकषाच्या आधारे निवड होणार आहे. त्यासाठी नोंदणी सुरू असून, ऑनलाइन प्रवेश अर्ज सादर करण्यास १५ जुलैपर्यंत मुदतवाढ दिली आहे.

२१ जुलैला सकाळी अकरा ते दीड या वेळेत यासाठी परीक्षा होणार आहे. निवड झालेल्या विद्यार्थ्यांना निःशुल्क निवासी स्वरूपाचे प्रशिक्षण उपलब्ध करून देण्यात येणार आहे. सध्या दहावीच्या गुणपत्रकाच्या आधारे अर्ज दाखल करता येत असून, अन्य प्रमाणपत्र प्रवेशाच्या वेळी सादर करण्याची सवलत दिली जाणार आहे.

निवड परीक्षेसाठी विद्यार्थ्यांनी ऑनलाइन गुगल फॉर्मद्वारे प्रवेश अर्ज सादर करावा. संबंधित गुगल फॉर्मची लिंक सर्व गटशिक्षण अधिकारी, विस्तार अधिकारी (शिक्षण) यांच्यामार्फत सर्वत्र उपलब्ध करून देण्यात आली आहे. ज्या विद्यार्थ्यांना ऑनलाइन अर्ज भरता येणार नाही, त्यांनी तालुक्याच्या गटशिक्षण अधिकारी कार्यालयात जाऊन ऑनलाइन प्रवेश अर्ज भरून घ्यावयाचा आहे. (latest marathi news)

‘जेईई’ अभ्यासक्रमासाठी फिजिक्स, केमिस्ट्री, गणित व इंग्रजी यात मिळालेल्या गुणांच्या आधारे गुणवत्तायादी तयार करण्यात येणार असून, ‘नीट’ अभ्यासक्रमासाठी फिजिक्स, केमिस्ट्री, बायोलॉजी व इंग्रजी यात मिळालेल्या गुणांच्या आधारे गुणवत्तायादी तयार करण्यात येणार आहे. यामध्ये फिजिक्स, केमिस्ट्री, बायोलॉजी, गणित व इंग्रजी या विषयांवर प्रत्येकी २५ प्रश्न असून, प्रत्येकी २५ गुण असणार आहेत.

विद्यार्थ्यांना आपले बैठक क्रमांक हे जिल्हा परिषदेच्या अधिकृत संकेतस्थळावर उपलब्ध करून देण्यात येणार असून, प्रत्येक तालुकास्तरावर परीक्षा केंद्र असणार आहे. या उपक्रमाच्या नियम निकषान्वये जिल्ह्याच्या ग्रामीण भागातील शासकीय, अनुदानित, अंशतः अनुदानित विद्यालयातून उत्तीर्ण झालेल्या जास्तीत जास्त विद्यार्थ्यांनी या उपक्रमात सहभागी व्हावे, असे आवाहन डॉ. अर्जुन गुंडे यांनी केले.