Nashik ZP News : जिल्हा परिषदेच्या लेखा व वित्त विभागाने सर्व विभागांचे ताळमेळ पूर्ण केले असून, सर्व विभागांचा मिळून सन २०२२-२३ या आर्थिक वर्षाचा ४९ कोटींचा निधी अखर्चित राहिला आहे. अखर्चित राहिलेला हा निधी शासन दरबारी जमा करण्यात आला. यात आरोग्य, शिक्षण व बांधकाम विभागाचा निधी आहे. गेल्या वर्षी ११५.७४ कोटींचा निधी अखर्चित होता. यंदा यात घट झाली असून, केवळ ४९ कोटींचा निधी अखर्चित राहिला आहे. ()

जिल्हा परिषदेला प्राप्त झालेला निधी खर्च करण्यासाठी दोन आर्थिक वर्षांची मुदत असते. या मुदतीत खर्च न झाल्यास तो निधी संबंधित यंत्रणांना जमा करावा लागतो. जिल्हा नियोजन समितीकडून सन २०२२-२३ या वर्षात प्राप्त झालेल्या ५५० कोटींचा निधी प्राप्त झाला होता. ३१ मार्चअखेर यातील ६५.२७ कोटी रुपये अखर्चित राहिला होता. मात्र, ग्रामविकास विभागाने २०२२-२३ या वर्षात मंजूर करण्यात आलेल्या निधीतील कामांची देयके ऑफलाइन पद्धतीने देण्यासाठी १२ एप्रिलपर्यंत मुदतवाढ दिली.

ही मुदतवाढ दिल्यावर १२ एप्रिलपर्यंत सर्वच विभागांनी मिळून ३२ कोटी रुपयांची देयके सादर केल्याने हा निधी खर्चाची टक्केवारी वाढली आहे. लेखा व वित्त विभागाने यंदा निधी खर्चासाठी विभागांकडे सतत पाठपुरावा केला. त्यामुळे निधी खर्चाची टक्केवारी ९५ टक्क्यांवर पोहोचली. निधी खर्च करण्याची मुदत संपल्यावर लेखा व वित्त विभागाने सर्व विभागांकडून ताळमेळ पूर्ण करून घेतला. (latest marathi news)

यासाठी महिनाभराचा कालावधी गेला. मुख्यालयातील सर्व विभाग तसेच तालुकास्तरावरील सर्व विभागांचा ताळमेळ पूर्ण झाला. यात सर्व विभागांचा मिळून ४९ कोटींचा निधी अखर्चित राहिला. यात, आरोग्य विभागाचा तीन कोटी आठ लाखांचा समावेश आहे. यातही औषध खरेदी ४६ लाख ९७ हजार, सिकलसेल आजार नियंत्रण यांचा १० लाख निधी आहे. या पाठोपाठ शिक्षण विभागाचा तीन कोटी ५४ लाख ३५ हजारांचा निधी आहे.

यात शाळा बांधकामाचा तब्बल दोन कोटी ११ लाख निधी आहे. दुरुस्त्यांचा निधीचा यात समावेश आहे. बांधकाम एक, दोन व तीन मिळून १४ कोटी २९ लाख ४३ हजारांचा निधी अखर्चित असून, हा परत जाईल. यात अंगणवाड्या, शाळा बांधकामाचा सर्वाधिक निधी आहे. हा अखर्चित निधी विभागाने शासनाकडे जमा केला.