नाशिक : नवी दिल्ली (New Delhi) येथील एअरपोर्ट अथॉरिटी ऑफ इंडिया स्पोर्टस कंट्रोल बोर्ड यांच्यातर्फे देशांतील पाच खेळातील 33 खेळाडूंना क्रीडा शिष्यवृत्ती जाहीर केली आहे. यात नाशिक जिल्हयाच्या दोन खो-खो खेळाडूंची निवड केली आहे. राज्य व देशातील सर्वोत्तम आक्रमकाचा पुरस्कार विजेती वृषाली भोये व आपल्या अष्टपैलू खेळाने महाराष्ट्राच्या विजयात मोलाचा वाटा उचलणारी कौसल्या पवार या दोघींचा यात समावेश आहे.

योजनेअंतर्गत ही शिष्यवृत्ती मिळवणाऱ्या त्या नाशिकच्या पहिल्या महिला खो-खो खेळाडू आहेत. या आधी नाशिकच्या दोन पुरुष खेळाडूंना ही शिष्यवृत्ती मिळाली होती. वृषाली व कौसल्या या दोघी संस्कृती नाशिक या संस्थेच्या खेळाडू असून त्या जिल्हा खो खो असोसिएशन व जिल्हा क्रीडा अधिकारी कार्यालय संचलित शिवछत्रपती महाराज क्रीडा संकुल येथील प्रशिक्षण केंद्रात सराव करतात. या दोघींना उमेश आटवणे व गीतांजली सावळे यांचे मार्गदर्शन लाभले. या निवडीबद्दल जिल्हा खो-खो असोसिएशनचे अध्यक्ष विश्वास ठाकूर, आजीवन अध्यक्ष रमेश भोसले कार्याध्यक्ष आनंद गारमपल्ली, खजिनदार सुनिल गायकवाड व अन्य पदाधिकारी यांनी अभिनंदन केले आहे.