Nashik News : भाजप व शिवसेनेच्या शिंदे सेनेचा बालेकिल्ला असलेल्या प्रभाग क्रमांक ७मधील समर्थनगर जॉगिंग ट्रॅक व जलतरण तलावाच्या दुरवस्थेवरून राष्ट्रवादी काँग्रेसने सुरु केलेली स्वाक्षरी मोहीम जिव्हारी लागल्याने मंगळवारी (ता. ७) आंदोलन चिरडण्याचा प्रयत्न महापालिकेच्या माध्यमातून झाला.

स्वाक्षरी मोहिमेला प्रतिसाद मिळत असताना महापालिकेच्या बांधकाम व अतिक्रमण विभागाने भल्या पहाटे नागरिक आंदोलनात सहभागी होण्यापूर्वीच स्वाक्षरी आंदोलन मोहिमेचा फलक उचलून नेला. (NCP BJP Shinde Sena clash over plight of swimming pool nashik news)

शासनाच्या निधीतून प्रभाग ७ मधील आकाशवाणी टॉवरजवळील समर्थ जॉगिंग ट्रॅक व जलतरण तलावाचे काम गेल्या पाच ते सहा वर्षांपासून सुरू आहे. जॉगिंग ट्रॅक व जलतरण तलाव लोकार्पण सोहळा होण्यापूर्वीच वादात सापडले आहे. समर्थ जॉगिंग ट्रॅक, तरण तलावाची अवस्था लोकार्पण सोहळ्यापूर्वीच दयनीय झाली आहे. तरण तलावात शेवाळे साचले असून, घाण पाण्यामुळे डासांची संख्या वाढली आहे.

ट्रॅक व तलाव परिसरात मोठ्या प्रमाणात गवत वाढले आहे. यंत्रणा धूळखात पडली आहे. चेंजिंग रुममध्ये दारूच्या बाटल्या तसेच गांजा ओढणाऱ्यांचा अड्डा बनले आहे. येथील खोल्या मद्यपींचा अड्डा बनले आहे. काम पूर्ण होऊनदेखील तरण तलाव वापरासाठी खुला केला गेला नाही. या पार्श्वभूमीवर तरण तलाव खुला करावा या मागणीसाठी स्वाक्षरी मोहीम राबविण्याचा निर्णय राष्ट्रवादी काँग्रेसकडून घेण्यात आला.

त्यासाठी स्वाक्षरी मोहीम राबविण्यात आली. बुधवारी (ता. ८) आंदोलनासाठी नागरिक एकत्र येण्याचे आवाहन करण्यात आले. परंतु, त्यापूर्वीच महापालिकेकडून स्वाक्षरी आंदोलनात सहभागी होण्याचे आवाहन करणारा फलक उचलून नेण्यात आल्याने आंदोलन चिरडण्याचा हा प्रयत्न आहे. त्यासाठी स्थानिक भाजप व शिंदे सेनेच्या नेत्यांनी दबाव आणला जात असल्याचे बोलले जात आहे.

"तरण तलाव व जॉगिंग ट्रॅकमुळे फायदा कमी तोटाच अधिक दिसून येत आहे. दुरवस्था व मद्यपींमुळे नागरिकांना त्रास होत आहे. याविरोधात आवाज उठविल्यानंतर नागरिकांचा प्रतिसाद मिळू लागल्याने स्थानिक भाजप आमदार, भाजप नगरसेवक व शिवसेनेच्या नगरसेवकांच्या पायाखालची वाळू घसरल्याने सत्तेचा दुरुपयोग करून आंदोलन चिरडण्याचा प्रयत्न होत आहे." -किशोर शिरसाट, मध्य विधानसभा मतदारसंघ, राष्ट्रवादी काँग्रेस.