नाशिक : नीट 2020 च्या उमेदवारांना खोटे, बनावट कॉल, एसएमएस प्राप्त होत असल्याचा धक्कादायक प्रकार समोर आला आहे. नेमके कुठल्या हेतूने हा प्रकार घडविला जातो आहे, याचा शोध घेण्यास सुरवात झालेली आहे. समाजातील अशा दुष्प्रवृत्तींविरोधात एनटीए कठोर कारवाई करण्याच्या भुमिकेत आहे. सविस्तर प्रकार असा की...

दुष्प्रवृत्तींविरोधात एनटीए कठोर कारवाई

नॅशनल टेस्टींग एजन्सी (एनटीए) यांच्यामार्फत सोमवारी (ता.11) सूचना जारी केली आहे. या सूचनेत म्हटले आहे, की नीट 2020 च्या उमेदवारांना खोटे, बनावट कॉल, एसएमएस प्राप्त होत असल्याची माहिती मिळाली आहे. या उमेदवारांना अर्जाची व अन्य वैयक्‍तिक माहिती विचारली जाते आहे. मात्र एनटीए यांच्याकडून कुठल्याही स्वरूपातील माहिती विचारली जात नाही. अर्ज क्रमांक किंवा अन्य वैयक्‍तिक माहितीसाठी विद्यार्थ्यांना कॉल, एसएमएस, ई-मेलद्वारे संपर्क साधला जात नाही. असे कॉल, एसएमएस, ई-मेल कुणाला प्राप्त झाल्यास त्यास प्रतिसाद देऊ नये. व आपला अर्ज क्रमांक व अन्य वैयक्‍तिक माहिती पूर्णपणे गोपनीय ठेवावी. समाजातील अशा दुष्प्रवृत्तींविरोधात एनटीए कठोर कारवाई करण्याच्या भुमिकेत आहे. तसेच विद्यार्थी व त्यांच्या पालकांनी अधिकृत अशा एनटीएच्या संकेतस्थळावरील माहितीवर विश्वास ठेवावा. तसेच शंका किंवा तक्रारीसाठी एनटीएशी संपर्क साधावा, असेही नमुद केले आहे.

विद्यार्थी व त्यांच्या पालकांनीही खबरदार राहाण्याच्या सूचना 

वैद्यकीय अभ्यासक्रम असलेल्या एमबीबीएस, बीडीएस, बीएएमएस, बीएचएमएस, बीयुएमएस, बी. एस्सी. (नर्सिंग) अशा विविध पदवी अभ्यासक्रमांच्या प्रथम वर्ष प्रवेशासाठी नॅशनल इलिजिब्लीटी कम एंट्रान्स टेस्ट (नीट) ही परीक्षा घेतली जाते. या परीक्षेला प्रविष्ठ असलेल्या विद्यार्थ्यांना संपर्क साधत त्यांना वैयक्‍तिक माहिती विचारली जात असल्याचा धक्‍कादायक प्रकार निदर्शनात आला आहे. नेमके कुठल्या हेतूने हा प्रकार घडविला जातो आहे, याचा शोध घेण्यास सुरवात झालेली आहे. तर विद्यार्थी व त्यांच्या पालकांनीही खबरदार राहाण्याच्या सूचना नॅशनल टेस्टींग एजन्सीमार्फत दिलेल्या आहेत.

हेही वाचा > कृषीमंत्र्यांची प्रार्थना अन् मौनव्रताला मारूतीराया पावणार का? मंदिरात तब्बल तीन तास ठिय्या

परीक्षेच्या तारखेची अधिकृत घोषणा बाकी

केंद्रीय मंत्र्यांनी वेबिनारद्वारे नीट, जेईई मेन्स परीक्षांच्या तारखांची घोषणा केली होती. मात्र अद्यापपर्यंत एनटीएतर्फे यासंदर्भात परीपत्रक जारी केलेले नाही. सद्यस्थितीत कोरोनाचा प्रादुर्भाव वाढत चालला असतांना परीस्थितीचे आकलन करून अंतीम निर्णय घेतला जाणार आहे. त्यामूळे अद्यापपर्यंत एनटीएमार्फत परीक्षेच्या तारखांची अधिकृत घोषणा केलेली नाही.

हेही वाचा > PHOTOS : थरारक! परप्रांतीय मजुरांना घेऊन जाणारे तीन ट्रक अन् एक कारचा भीषण अपघात..