नाशिक : मागील वर्षी मंजूर केलेली रस्त्यांची कामे अपूर्ण असताना नव्याने दोनशे कोटींचे रस्ते तयार करण्याचा घाट घातला जात आहे. पूर्वीच्या रस्त्यांची कामे कोरोनाचे कारण देत अपूर्ण असून, नव्याने रस्ते तयार करण्याची निविदा काढण्यासाठी बांधकाम विभाग सरसावला आहे. 

मागील वर्षीची कामे अद्याप अपूर्ण 
सिंहस्थात महापालिकेतर्फे रस्ते तयार करण्यात आले. तीनशे कोटींची रस्त्यांची कामे पूर्ण होताना दोन वर्षे लागले. निवडणुका होऊन महापालिकेत सत्तेवर आलेल्या भाजपने २०१७ मध्ये अडीचशे कोटींचे रस्ते तयार करण्याचा प्रस्ताव सादर केला होता. तत्कालीन आयुक्त तुकाराम मुंढे यांनी भाजपच्या रस्ते विकासाच्या प्रकल्पाला ब्रेक लावला. मुंढे यांच्या बदलीनंतर १५७ कोटींचे रस्तेकामाला मंजुरी देण्यात आली. रस्त्याची कामे सुरू झाल्यानंतर मार्चमध्ये लॉकडाउन जाहीर करण्यात आला. मजूर मिळत नसल्याचे कारण देत कामे पुढे ढकलण्यात आली. त्यामुळे आधीच कामे अपूर्ण असताना काही ठेकेदारांची बिले काढल्याची चर्चा आहे.

हेही वाचा > ह्रदयद्रावक! अखेरच्या क्षणीही मैत्रीचा घट्ट हात कायम; जीवलग मित्रांच्या एकत्रच निघाल्या अंत्ययात्रा

लॉकडाउनमुळे कामे बंद

एकीकडे कार्यारंभ आदेश दिलेली कामे अपूर्ण असताना नव्याने दोनशे कोटींच्या नवीन रस्त्यांची कामे काढण्याचा प्रयत्न सुरू झाला आहे. जानेवारीत रस्त्यांची कामे सुरू झाली होती. लॉकडाउनमुळे कामे बंद ठेवण्यात आली. त्यानंतर पावसाळा सुरू झाला. आता दिवाळीनंतर डांबराचे प्लांट सुरू होणार असल्याने रस्त्यांची कामे पूर्ण होतील, असा दावा शहर अभियंता संजय घुगे यांनी केला.  

हेही वाचा > धक्कादायक! रक्षकच जेव्हा भक्षक बनतो तेव्हा; पोलिस पतीसह पाच जणांकडून पत्नीचा छळ