नाशिक : घरकुल योजनेत घर मिळूनही झोपडीचा ताबा न सोडणाऱ्या झोपडपट्टीधारकांना महापालिकेच्या अतिक्रमण विभागाकडून नोटिसा बजावण्यात आल्या आहेत.

घरकुल योजनेत घर मिळालेल्या जवळपास दीडशे नागरिकांकडून गंजमाळ येथील झोपडपट्टीतील घरे खाली करून घेतले जाणार आहे. (NMC News Ganjmal slum to be demolished nashik)

केंद्र व राज्य सरकारकडून २००७ व २००८ मध्ये झोपडपट्टीतील नागरिकांसाठी घरकुल योजना राबविण्यात आली. या योजनेअंतर्गत महापालिकेकडून जागांची निवड करून तेथे घरकुल योजना राबविण्यात आली.

तेथे झोपडपट्टीधारकांना सामावून घेण्याचा निर्णय घेण्यात आला होता. जवळपास सहा हजार घरांची निर्मिती करण्यात आली. यातील गंजमाळ श्रमिकनगर येथील ३००५ झोपड्यांची नोंद करण्यात आली.

३०५ झोपड्यांपैकी २१५ झोपडी धारकांनी घरकुल योजनेत समाविष्ट होण्यासाठी नोंदणी केली. २१५ पैकी १५० झोपड्यांसाठी घरकुले मंजूर करण्यात आले. वडाळा व चुंचाळे येथे घरकुल योजनेअंतर्गत ताबा मिळूनही झोपडपट्टीचा ताबा सोडला नसल्याची बाब सर्वेक्षणात आढळून आली.

त्याअनुषंगाने महापालिकेच्या अतिक्रमण व घरकुल योजना विभागाकडून श्रमिकनगरच्या घरकुल मिळालेल्या दीडशे झोपडीधारकांकडून झोपडी खाली करून घेतली जाणार आहे, अशी माहिती अतिक्रमण उपायुक्त नितीन नेर यांनी दिली.