नाशिक : महापालिकेच्या विविध विभागाच्या माध्यमातून दिवाळीत सुरू करण्यात आलेली ढोल बजाव मोहीम स्थगित करण्यात आल्यानंतर आता पुन्हा नव्याने सुरू करण्यात आली आहे. गुरुवारी (ता. १७) थकबाकीदारांच्या दारासमोर ढोल वाजून जवळपास १७ लाख रुपये वसूल करण्यात आले. (NMC Property Tax dhol bajao Recovery 17 lakhs dues recovered from Nashik Road)

मालमत्ता कराची थकबाकी ३०० कोटी रुपयांवर पोचली आहे. त्या पार्श्वभूमीवर वसुली करण्यासाठी महापालिकेने थकबाकीदार मिळकत धारकांच्या घरासमोर ढोल बजाव मोहीम राबवण्यास सुरवात केली. दिवाळीच्या कालावधीत मोहीम स्थगित करण्यात आली होती. १७ नोव्हेंबरला नाशिक रोड विभागात मोहीम राबविण्यात आली.

येथून १७ लाख २४ हजार ७६४ रुपये थकबाकी वसूल करण्यात आली. घरपट्टी विभागाचे सहाय्यक अधीक्षक शरदकुमार जाधव, राकेश पवार, हेमंत रौंदळ, नाना पोरजे, शरद मरसाळे, महेंद्र शिंदे, अभिजित देशमुख, मुकुल लोखंडे, विजय बोराडे, रवींद्र गोसावी, स्वप्नील कोठुळे, रवींद्र गांगुर्डे, तेजस गांगुर्डे, रोहित ताठे आदींनी कारवाईत सहभाग घेतला.