नाशिक : उच्च व तंत्रशिक्षणमंत्री उदय सामंत यांच्या सूचनांनुसार सावित्रीबाई फुले पुणे विद्यापीठाने जिल्हास्तरावर मार्गदर्शन व समुपदेशन केंद्र सुरू केले आहेत. परंतु परीक्षांचा आराखडाच अद्याप जाहीर केलेला नसताना समुपदेशन केंद्रांची यादी प्रसिद्ध केली. यातून विद्यापीठाच्या नाशिक, पुणे व नगर येथील एकूण नऊ केंद्रांवर रोज हजारो विद्यार्थी संपर्क साधत आहेत. परंतु ठोस आराखडा हाती नसल्याने प्रतीक्षा करण्याचा सल्ला संबंधितांना दिला जातो आहे. 

समुपदेशकांकडून संबंधितांना सबुरीचा सल्ला

कोविड-19 मुळे निर्माण झालेल्या परिस्थितीत परीक्षेविषयीचे धोरण उच्च व तंत्रशिक्षणमंत्री उदय सामंत यांनी फेसबुक लाइव्हद्वारे जाहीर केले होते. यानंतर विद्यापीठस्तरावर परीक्षांचा आराखडा तयार करण्याच्या सूचना देत समुपदेशनासाठी जिल्हास्तरावर सुविधा उपलब्ध करून देण्याच्या सूचना केल्या होत्या. तसेच परीक्षांसंदर्भातील वेळापत्रक विद्यापीठस्तरावर जारी करण्याचेही सूचविले होते. त्यानुसार सावित्रीबाई फुले पुणे विद्यापीठाच्या स्तरावर परीक्षाविषयीचे धोरण, आराखडा तयार करण्याच्या प्रक्रियेला सुरवात झालेली आहे. येत्या चार-सहा दिवसांत परीक्षेचे वेळापत्रक व संभाव्य शंकांचे निरसन करण्यासाठीची माहिती विद्यापीठ स्तरावरून उपलब्ध करून दिली जाणार आहे. तत्पुर्वी विद्यार्थ्यांच्या सुविधेसाठी मार्गदर्शन व समुपदेशन केंद्र कार्यान्वित करण्याची घाई विद्यापीठाने केली. सोमवारी (ता. 11) परिपत्रक जारी करत या केंद्रांचे संपर्क क्रमांक विद्यापीठाने उपलब्ध करून दिले होते. या प्रत्येक केंद्राला रोजचे दीडशे ते तीनशे विद्यार्थी, पालक किंवा अन्य व्यक्‍तींकडून संपर्क साधला जातो आहे. परंतु हातात ठोस माहिती उपलब्ध नसल्याने केंद्रावर तैनात समुपदेशकांकडून संबंधितांना सबुरीचा सल्ला दिला जात आहे. 
 
...मग घाई कशासाठी 

विद्यापीठातर्फे परीक्षाविषयक आराखडा तयार करण्याची प्रक्रिया सुरू असतानाच समुपदेशन केंद्र कार्यान्वित केले आहेत. या केंद्रांवर मोठ्या संख्येने विद्यार्थी संपर्क करत आहेत. परंतु केंद्रावरील मनुष्यबळाकडे ठोस माहिती उपलब्ध करून न देता केंद्र कार्यान्वित करण्याची घाई कशासाठी, असा प्रश्‍न यानिमित्त उपस्थित होतो आहे. ठोस तारखा हाती नसल्याने सध्या श्री. सामंत यांनी जाहीर केलेल्या घोषणांविषयीची माहिती संपर्क साधणाऱ्या विद्यार्थ्यांना दिली जात आहे. 

हेही वाचा > मालेगावकरांनो..आकडा वाढत असला तरी दिलासादायक 'घटना'ही घडताहेत बरं का!

नऊ समुपदेशन केंद्र 

पुणे विद्यापीठाच्या कार्यक्षेत्रात असलेल्या पुणे जिल्ह्यात चार महाविद्यालयांत केंद्र आहे. नगर जिल्ह्यात तीन केंद्र आहेत. नाशिकला केटीएचएम महाविद्यालय व के. के. वाघ अभियांत्रिकी महाविद्यालयातील केंद्राचे संपर्क क्रमांक दिलेले आहेत.  

हेही वाचा > VIDEO : "मी अंध असूनही त्यावर मात करू शकली..मग तुम्ही का नाही?"