नाशिक : ग्रामीण भागातील नागरिकांनी कोरोनाला (Corona) धुडकावत तिसरी लाट आटोक्यात आणली असली, तरी लसीकरणाच्या बाबतीत मात्र मोठा धोका स्वीकारला आहे. पहिल्या लाटेने भीती निर्माण केल्याने लस उपलब्ध झाल्यानंतर टोचणाचा धडाका लावला. परंतु दुसरी लाट पहिल्या लाटेपेक्षा भयानक असली तरी कोरोना प्रतिबंधात्मक डोस मात्र तेवढ्या प्रमाणात घेतला गेला नाही, असे जिल्हा परिषदेच्या (ZP) आरोग्य विभागाच्या अहवालावरून स्पष्ट झाले आहे.

करोना महामारी ने मार्च २०२० पासून शहरासह ग्रामीण भागात हात पाय पसरले. पहिल्या व दुसऱ्या लाटेत जवळपास एक लाख ५८ हजार २७७ कोविड रुग्ण आढळले. पहिल्या व दुसऱ्या लाटेत मोठ्या प्रमाणात रुग्ण आढळल्याने तिसरी लाट दोन्ही लाटांपेक्षा भयानक असेल, असे संकेत दिले जात होते. परंतु परिस्थिती उलट झाल्याचे स्पष्ट झाले. त्यातही आदिवासी भागात कोविड स्थिती असून नसल्यासारखे असल्याचे दिसून आले. दरम्यान पहिल्या लाटेनंतर राज्य सरकार मार्फत प्रतिबंधात्मक लसीकरण (Vaccination) सुरु करण्यात आले.

प्रथम आरोग्य व वैद्यकीय सेवा देणारे तसेच सरकारी कर्मचारी अशा कोविड योध्यांना लस टोचण्यात आली. त्यानंतर साठ वर्षांपुढील नागरिकांसाठी लसीकरणाचा कार्यक्रम आखण्यात आला. त्यानंतर ४५ ते ६० वयोगटासाठी लसीकरणाची मोहीम आखण्यात आली. शहरा बरोबरच ग्रामीण भागात ग्रामीण आरोग्य केंद्राच्या माध्यमातून लसीकरण केले गेले. पहिल्या डोसला चांगला प्रतिसाद मिळाला. जवळपास निम्म्याहून अधिक तालुक्यांमध्ये ९० टक्क्यांपेक्षा जास्त लसीकरण झाले. पहिल्या लाटेत तीस लाख ३४ हजार २४५ नागरिकांना लस देण्यात आली. एकूण ९१.५१ टक्के लसीकरण झाले. त्यानंतर दुसऱ्या डोसला मात्र अपेक्षित प्रतिसाद मिळाला नाही. पंचवीस लाख २९ हजार ९८९ नागरिकांनी कोरोना प्रतिबंधात्मक डोस घेतला आहे. त्याची एकूण टक्केवारी ७६.३० टक्के आहे.

बूस्टर डोसला अल्प प्रतिसाद

दोन डोसला बूस्टर करण्यासाठी तिसऱ्या डोसचे नियोजन करण्यात आले. आरोग्य केंद्रांच्या माध्यमातून बूस्टर डोसची (Booster dose) व्यवस्था करण्यात आली आहे. परंतु जिल्हा भरात अवघे ५२ हजार ६२५ नागरिकांनी बूस्टर डोस घेतला. लोकसंख्येचा विचार करता टक्केवारीत हे प्रमाण पाच टक्क्यांच्या आसपास आहे. नाशिक तालुक्यात बार हजार ९४७ लोकांनी बूस्टर डोस घेतला आहे.

तालुकानिहाय पहिला, दुसरा डोस (कंसात टक्केवारी)

तालुका पहिला डोस दुसरा डोस

नाशिक २,१२,१९७ (९६.२७) १,९१,०२५ (८६.६७)

दिंडोरी २,४५,४६१ (९३.१७) २,२६,६४४ (८६.०३)

त्र्यंबक १,२८,५९० (९०.६३) १,०६,४१३ (७५)

इगतपुरी १,८६,०८४ (९३.१९) १,४७,७९० (७४.०१)

निफाड ३,४८,७२८ (८८.१५) ३,३३,१५८ (८४.२१)

चांदवड १,७४,२६३ (९१.४९) १,४०,७२५ (७३.८८)

सिन्नर २,६४,२०० (९१.६२) २,३१,५४६ (८०.३०)

कळवण १,६५,५४२ (९२.५९) १,२९,६०९ (७२.४९)

मालेगाव २,७०,९३८ (९१.५६) २,२८,६३८ (७७.२६)

पेठ ९३,०१३ (९३.१२) ७६,११९ (७६.२१)

देवळा १,०८,५४८ (९३.२३) १०,०६४४ (८६.४५)

बागलाण २,९०,१३४ (९२.४९) २,३५,२५२ (७४.९९)

येवला १,८८,७५६ (८५.८३) १,३९,५२८ (६३.४५)

नांदगाव २,२३,००४ (९१.०९) १,५५,९२१ (६३.६९)

सुरगाणा १,३४,७८७ (९२.०८) ८६,९७८ (५९.४२)