जुने नाशिक : हज यात्रेसाठी ऑनलाइन अर्ज भरण्यास सोमवार (ता.१५) शेवटची मुदत होती. मुदत अखेर देशातून १ लाख ६० हजार तर राज्यभरातून २४ हजार ९३५ अर्ज भाविकांनी दाखल केले आहे.

शहरातील ३५० भाविकांचा यात समावेश आहे. (One lakh 60 thousand applications for Hajj from all over country Including 1 thousand 650 devotees from Nashik district)

दरवर्षी मुस्लिम बांधवांसाठी हज कमिटीतर्फे यात्रेचे आयोजन केले जाते. देशभरातून लाखाच्या संख्येने भाविक यात्रेस जात असतात. यंदाच्या हज यात्रेनिमित्ताने देशासाठी १ लाख ७५ हजारांचा कोटा देण्यात आला आहे.

अर्ज करण्यासाठी हज कमिटीतर्फे प्रथम बुधवार २० डिसेंबरपर्यंत मुदत देण्यात आली होती. भाविकांच्या मागणीनुसार अर्ज करण्यासाठी मुदत वाढविण्यात आली होती. सुमारे २५ दिवसांची मुदत वाढ देण्यात आली होती.

सोमवार (ता.१५) भाविकांना अर्ज करण्याची शेवटची मुदत होती. मुदत अखेर देशभरातून १ लाख ६० हजार तर राज्यातून २४ हजार ९३५ अर्ज अर्ज दाखल झाले आहेत. शहरातून ३५० तर मालेगाव येथून १ हजार ३०० असे जिल्ह्यातून १ हजार ६५० भाविकांचा यात समावेश आहे.

त्यात राज्यातील मेहरम नसलेले १०६ महिला भाविक यांच्यासह ७० वर्षापेक्षा अधिक वय असलेले १ हजार १०६ भाविकांसह अन्य २३ हजार ५५४ भाविकांनी अर्ज दाखल केल्याची माहिती कमिटीच्या सदस्यांकडून देण्यात आली.

येत्या काही दिवसात छाननी होऊन जानेवारी अखेरीस अथवा फेब्रुवारीच्या सुरवातीस लकी ड्रॉ होण्याची शक्यता असल्याचे सूत्रांकडून सांगण्यात आले.

"मुंबई विमानतळावरून हज यात्रेस जाण्यास कमी खर्च लागतो. त्यामुळे मुंबई येथून २२ हजार ६२८, नागपुरमधून १ हजार १३१, औरंगाबाद येथून १०६ भाविकांनी तर नांदेड, बीड, उस्मानाबाद भागातून ८६९ भाविकांनी हैदराबाद येथून अर्ज केले आहे." - हाजीहमीद खान, खादिमुल हुज्जाज हज कमिटी ग्रुपचे सदस्य