नाशिक : नाशिक शहर(nashik), मालेगाव शहर(malgeoan), ग्रामीण भागामध्ये(rural area) गेल्या २७ दिवसांमध्ये १५ हजार ६५५ मुलांची आरटीपीसीआर (rtpcr test)अन रॅट चाचणी करण्यात आली आहे. त्यामध्ये १५४ मुले कोरोना पॉझिटिव्ह(corona positive) आढळली असून पॉझिटिव्हीचा दर एक टक्का राहिला आहे. शून्य ते पाच वर्षे आणि सहा ते दहा वर्षे वयोगटामध्ये पॉझिटिव्हिटीचे प्रमाण प्रत्येकी १.३ टक्के राहिले आहे.अकरा ते पंधरा वर्षे वयोगटात १.२, सोळा ते अठरा वर्षे वयोगटात ०.७ टक्के कोरोना पॉझिटिव्हिटीचे प्रमाण आरोग्य यंत्रणेला आढळून आले आहे.

कोरोनाची लागण झाल्याची स्थिती पाहता, विशेषतः शाळेत न जाणाऱ्या आणि पहिली ते नववीपर्यंतच्या मुलांची काळजी घेण्याचे आव्हान कुटुंबांपुढे उभे ठाकले आहे. मुलांकडून मास्क वापरला जाईल, हात स्वच्छ धुतला जाईल आणि अंतर राखले जाईल याची काळजी घेण्यापासून ते एखादे मूल आजारी आढळल्यास त्याच्यावर तातडीने वैद्यकीय इलाज करण्यावर भर द्यावा लागणार आहे. आरोग्य विभागातर्फे मुलांच्या आरोग्याची काळजी घेण्याबाबतच्या सूचना शाळांना देण्यात आल्या आहेत. शाळेत येताना प्रत्येक मुलाचे तापमान मोजणे, ऑक्सीमीटरने तपासणी करणे इथंपासून ते मुले गर्दीने एकत्र अधिक काळ थांबणार नाहीत इथपर्यंतच्या सूचनांचा त्यात समावेश आहे. याशिवाय सर्दी, खोकला, ताप आढळल्यास अशा मुलांकडे लक्ष देण्यास सांगण्यात आले आहे.

मुलांमध्ये लागण अधिक

कोरोना पॉझिटिव्ह आढळलेल्यांमध्ये मुलांचे प्रमाण अधिक म्हणजे १.२० टक्के इतके आहे. ०.७४ टक्के मुली पॉझिटिव्ह आढळल्या आहेत. वयोगटनिहाय आरटीपीसीआर आणि रॅट चाचणी करण्यात आलेल्या मुलांची संख्या पुढीलप्रमाणे असून (कंसात कोरोना पॉझिटिव्ह आढळलेल्या मुलांची संख्या दर्शवते) : मुली : शून्य ते पाच वर्षे-५०५ (४), सहा ते दहा वर्षे-१ हजार ४८ (१४), अकरा ते पंधरा वर्षे-३ हजार १३ (२४), सोळा ते अठरा वर्षे-२ हजार ८४३ (१४). एकूण-७ हजार ४०९ (५५). मुले : शून्य ते पाच वर्षे-६२० (१०), सहा ते दहा वर्षे-१ हजार ६८ (१४), अकरा ते पंधरा वर्षे-२ हजार ८२१ (४५), सोळा ते अठरा वर्षे-३ हजार ७३६ (३०). एकूण-८ हजार २४५ (९९).

वयोगटनिहाय कोरोना रुग्ण

1. शून्य ते पाच वर्षे १४

2. सहा ते दहा वर्षे २८

3. अकरा ते पंधरा वर्षे ६९

4. सोळा ते अठरा वर्षे ४४

5. १९ आणि अधिक वर्षे १ हजार ६६

6. (तरुणी-४८४ आणि तरुण-५८२)