येसगाव (जि. नाशिक) : उन्हाळ भगवा कांद्याला रास्त भाव नसल्याने अद्यापपर्यंत कांद्याची साठवणूक चाळीत केली होती. मध्यंतरी भाव कोसळल्याने भाववाढीच्या प्रतीक्षेत मात्र भाव घसरत राहिले. त्यामुळे शेतकऱ्यांचे हिरवे स्वप्न धुळीस मिळाले. शेतकऱ्यांनी कांदा विक्रीसाठी काढला नव्हता. गेल्या हंगामात शेतकऱ्यांनी मेहनतीने उन्हाळ भगवा कांद्याचे पीक उभे केले. हवामान प्रतिकूल राहिल्याने काही भागातून उत्पादनात घट आली. शिवाय मध्यंतरी बेमोसमी पावसामुळे कांद्याचे अतोनात नुकसान शेतकऱ्यांना सोसावे लागले. बिकट परिस्थितीत भाववाढीच्या आशेवर चाळीत साठवून ठेवला कांदा ऊन, पाऊस वातावरणामुळे सडण्यास सुरवात झाल्यामुळे बळीराजाला नुकसानीला सामोरे जावे लागणार आहे.

कांद्यासाठी शेतकरी सोसायटी, बँक, विविध पतसंस्थेकडून, खासगी कर्ज उचलतो. कांद्याला योग्य भाव नसल्यामुळे कर्जे, बिले, घर-परिवार खर्च कसा करावा, ही विवंचना वाढली आहे. काही दिवसांपासून भाववाढ झाल्याने शेतकरी चाळीतील खराब कांदा निवडून चांगल्या कांद्याची प्रत बाजूला करून तो विक्रीसाठी तयार करण्यासाठी लगीनघाई करीत आहे. मोठ्या प्रमाणावर कांदा खराब झाल्याने कांदा निवडण्यासाठी मजुरीचा अतिरिक्त खर्च वाढला आहे. कांद्याला चांगला भाव टिकून राहावा, अशी अपेक्षा शेतकऱ्यांकडून व्यक्त होत आहे. कांदा सडू लागल्याने मिळेल त्या भावात विक्रीसाठी काढला जात आहे.

कांदाचाळीत सात ट्रॅक्टर भगवा कांदा साठविला होता. उत्पादनखर्च निघण्याएवढा भाव नसल्यामुळे कांदा विक्रीसाठी काढला नाही. थोडाफार भाव वाढल्यानंतर कांदा विक्रीसाठी काढला. दोन ट्रॅक्टर चांगला माल वगळता बाकीचा सर्व कांदा खराब झाला.
-संजय सूर्यवंशी, शेतकरी, येसगाव बुद्रुक