नाशिक : केंद्रीय लोकसेवा आयोगामार्फत 4 ऑक्‍टोबर 2020 ला नागरी सेवा पूर्वपरीक्षा होणार आहे. या परीक्षेसाठी बसलेल्या उमेदवारांना परीक्षा केंद्र बदलाची "यूपीएससी'कडून संधी दिली जाणार आहे. कोरोनाच्या पार्श्‍वभूमीवर हा निर्णय घेतला आहे. 

यूपीएससीतर्फे जारी पत्रक

केंद्रीय लोकसेवा आयोगातर्फे यापूर्वीच परीक्षेच्या तारखांमध्ये बदल करण्यात आला होता. असे असताना अजूनही कोरोनामुळे निर्माण झालेल्या परिस्थितीत सुधारणा दिसत नसल्याने परीक्षा केंद्रात बदल करण्याची सवलत द्यावी, अशी मागणी उमेदवारांकडून केली जात होती. ही बाब लक्षात घेत उमेदवारांना परीक्षा केंद्र बदलाची संधी उपलब्ध करून दिली असल्याचे यूपीएससीतर्फे जारी पत्रकात म्हटले आहे. 

दोन टप्प्यांत संधी 
उमेदवारांना दोन टप्प्यांत अर्ज दुरुस्तीची संधी दिली जाणार आहे. पहिल्या टप्प्यांत मंगळवार (ता. 7)पासून 13 जुलैच्या सायंकाळी सहापर्यंत अर्ज दुरुस्ती करताना परीक्षा केंद्र निवडता येईल. दुसऱ्या टप्प्यात 20 ते 24 जुलै (सायंकाळी 6 पर्यंत) संकेतस्थळावरून अर्जात दुरुस्ती करून परीक्षा केंद्र निवडता येईल. एकदा निवडलेला पर्याय लॉक होईल, असेही यूपीएससीतर्फे स्पष्ट केले आहे. त्यामुळे एकदा बदललेला पर्याय पुन्हा बदलता येणार नाही. प्रथम येणाऱ्यास प्रथम उपलब्धता या तत्त्वानुसार परीक्षा केंद्र उपलब्ध करून दिले जाईल. 

हेही वाचा >प्रेरणादायी..! पत्नी खंबीर.. बेरोजगार व्यावसायिक पतीला दिली अशी साथ...संसाराचा केला स्वर्ग!​

 
अर्ज माघारीची संधी 
उमेदवारांनी या परीक्षेसाठी यापूर्वी भरलेला अर्ज माघारी घेण्याचीही संधी दिली जाणार आहे. परीक्षा केंद्र दुरुस्तीची प्रक्रिया पूर्ण झाल्यानंतर 1 ते 8 ऑगस्टदरम्यान नोंदणीकृत उमेदवारांना त्यांचा अर्ज मागे घेण्याची सवलत दिली जाईल.

हेही वाचा > संतापजनक! "...तर गौरव आज आमच्यात असला असता.."आरोप करत नातेवाईकांनी फोडला हंबरडा..आरोग्य केंद्राची तोडफोड