नाशिक : कोरोना विषाणू संसर्ग रोखण्यासाठी करण्यात आलेल्या लॉकडाउनच्या पार्श्‍वभूमीवर कष्टकरी, हातावरचे पोट असलेले कामगार सैरभैर झाले आहेत. याच पार्श्‍वभूमीवर महाराष्ट्राच्या सीमेवर अथवा जिल्ह्यातील सीमेवर येणाऱ्या प्रवाशांच्या कार्यवाहीचे आदेश आरोग्य विभागाने विभागीय आयुक्तांसह जिल्हाधिकारी आणि मुख्य कार्यकारी अधिकाऱ्यांना दिलेत. जिल्ह्यांमध्ये क्वारंटाइनमध्ये ठेवून आवश्‍यक मूलभूत सुविधा देण्याची सूचना करण्यात आली आहे.

सर्व प्रवाशांची वैद्यकीय तपासणी करून आवश्‍यकतेनुसार औषधोपचार

महाराष्ट्रातील आणि काही कारणांमुळे परराज्यात गेलेले प्रवासी, स्थलांतरित कामगार, बेघर आदी राज्यात परत येत आहेत. त्यातील बरेचसे जण पायी अथवा आडमार्गाने येत आहेत. या प्रवाशांकडून कोरोना विषाणूचा प्रसार होऊ शकतो. ही बाब लक्षात घेऊन कार्यवाहीला सुरवात करण्यात आली. परराज्यातून आलेले प्रवासी, स्थलांतरित कामगार व बेघरांना महसूल विभागाने दिलेल्या वास्तव्याच्या ठिकाणी आणल्यानंतर जवळच्या प्राथमिक आरोग्य केंद्रांच्या वैद्यकीय अधिकाऱ्यांना कळविण्याच्या सूचना द्यावयाच्या आहेत. वैद्यकीय अधिकाऱ्यांनी सर्व प्रवाशांची वैद्यकीय तपासणी करून आवश्‍यकतेनुसार औषधोपचार करायचे आहेत. गरोदर माता, बालकांची विशेष काळजी घ्यायची आहे. 

आरोग्य शिक्षण द्यायचे 

वैद्यकीय अधिकाऱ्यांनी सर्व प्रवाश्‍यांना कोविड-19 आजार व आजाराच्या प्रतिबंधासाठी वैयक्तिक आणि सार्वजनिक घ्यावयाची काळजी, याबाबत आरोग्य शिक्षण द्यायचे आहे. प्रवाशांमध्ये ताप (शंभर फॅरेनाइटच्या पुढे), खोकला, धाप लागणे अशी लक्षण असणारे प्रवाशांना पुढील तपासणीसाठी रुग्णवाहिकेने जिल्हा रुग्णालयात पाठवायचे आहे. जिल्हा रुग्णालयात संशयितांना कक्षात दाखल करावयाचे आहे. त्यांच्या घशातील स्त्रावाचा नमुना तपासणीसाठी पाठवायचा आहे. अहवाल सकारात्मक आल्यास तत्काळ आयसोलेशन कक्षात दाखल करायचे. अहवाल नकारात्मक आल्यास महसूल विभागाच्या मार्गदर्शक सूचनांनुसार पुढील कार्यवाही करावयाची आहे. 

हेही वाचा > #Lockdown : 'ताई, खूप दिवसांनी घरचं जेवण मिळालं!'...अन् 'त्या' पोलिसांचे डोळे पाणावले​

ठळक उपाययोजना 

- रुग्णांची चाचणी सकारात्मक आल्यास त्यांच्या सहवासातील सर्वांची माहिती घ्यायची. त्यांना स्वतंत्रपणे चौदा दिवसांसाठी क्वारंटाइनमध्ये ठेवावे. लक्षणे आढळून आल्यास पुढील कार्यवाही करावी. 
- पाचशेपेक्षा अधिक प्रवाशी एका ठिकाणी असल्यास तेथे बहुविध आरोग्यसेवक (पुरुष) यांना 24 तास उपलब्ध ठेवायचे आहे.  

हेही वाचा > रक्ताच्या थारोळ्यात बेशुद्ध अवस्थेत पडलेल्या 'त्या' अनोळखी तरुणाच्या मदतीला देवदूतासारखा धावून आला!