नाशिक : (ओझर) येथील ग्रामपालिकेच्या मालकीच्या जागेवर बांधलेले गाळे भाडेतत्वावर दिलेल्या काही व्यावसायिक गाळेधारकांची थकबाकी वाढल्यामुळे ग्रामपालीका प्रशासनाने कारवाईचे हत्यार उपसले. ग्रामसेवकांच्या रौद्रवतार बघून अनेकांना तुकाराम मुंडेंचीच कार्यपद्धती आठवली.

चार लाख दहा हजार रुपयांची तडकाफडकी वसुली

वाढत चाललेल्या जुन्या थकबाकीमुळे ग्रामपालिका अनेक वर्षांपासून काही गाळेधारकांना वसुली करण्यासाठी मागे लागली होती. त्यात अनेकांनी येऊन ती भरली देखील. शेवटी उरलेल्या 37 गाळे धारकांना येथील ग्रामविकास अधिकारी दत्तात्रय देवकर यांनी पंधरा दिवसांपूर्वी नोटिसा बजावल्या. त्यास 29 जणांनी सकारात्मक प्रतिसाद देत रकमा जमा केल्या. उरलेल्या आठ जणांवर नोटिशीची मुदत संपल्यावर ग्रामविकास अधिकारी देवकर यांनी आपला मोबाईल बंद करून कर्मचाऱ्यांना सोबत घेऊन कारवाई करायला गुरुवारपासून सुरवात केली. त्यात मटण मार्केट येथील पाच, प्रियदर्शनी येथील एक तर खंडेराव मंदिर जवळ दोन अशा 8 गळ्यांना सील केले. 

भाडेकरूंची प्रशासनाबरोबर बाचाबाची

यावेळी काही भाडेकरूंची प्रशासनाबरोबर बाचाबाची झाली. देवकर यांनी ठाम पवित्रा घेतल्याने सील झालेल्या दुकानदारांनी एकूण चार लाख दहा हजार रुपये आणून भरले. नंतर सगळ्यांची दुकाने उघडण्यात आली. यासर्व प्रकरणी दुपारनंतर ओझर शहरात एकच चर्चा घडली. या कारवाईत सुभाष शेजवळ, दिलीप ठुबे, संतोष सोनवणे, योगेश गोरे, तुकाराम गवळी, सतीश सोनवणे यांच्यासह ग्रामपालिका कर्मचारी सहभागी झाले होते. 

हेही वाचा > विवाह समारंभाला आलेल्या कुटुंबियांना बनविला निशाणा! दहा लाखांहून अधिक ऐवज लंपास

मार्च एन्डला कोरोना लॉकडाऊन झाल्यानंतर ग्रामपालिकेची आर्थिक स्थिती त्यावेळी केलेल्या उपाययोजनामुळे काहीशी बिघडली. उत्पन्नाचे स्रोत असतानाही अनेक लोक ते भरण्यास टाळाटाळ करत होते. काही दिवसात पाणी आणि घरपट्टी वसुलीसाठी देखील अशीच वसुली मोहीम हाती घेणार आहे. - दत्तात्रय देवकर, ग्रामविकास अधिकारी,ओझर.

हेही वाचा > सिनेस्टाईल थरार! पोलिसांची चाहूल लागताच रिक्षाचालकाने ठोकली धूम; अखेर संशय खरा ठरला