नाशिक : शिक्षणशास्त्र शाखेतील विविध पदवी व पदव्युत्तर पदवी अभ्यासक्रमांच्या प्रवेशासाठी होणाऱ्या सीईटीकरिता अर्ज भरण्याची प्रक्रिया सुरू होती. लॉकडाउनमुळे अर्ज भरण्याच्या प्रक्रियेला दुसऱ्यांदा मुदतवाढ दिलेली आहे. त्यानुसार आता इच्छुक पात्र विद्यार्थ्यांना 8 मेपर्यंत ऑनलाइन स्वरूपात अर्ज दाखल करता येणार आहे. 

अभ्यासक्रमांच्या प्रवेशाकरिता अर्जाची मुदतवाढ

राज्य सामाईक प्रवेश परीक्षा कक्षाने या संदर्भात सूचना जारी केली आहे. यापूर्वी दिलेल्या मुदतवाढीनुसार एप्रिलच्या दुसऱ्या आठवड्यापर्यंत अभ्यासक्रमांच्या प्रवेशाकरिता अर्जाची मुदतवाढ दिलेली होती. बहुतांश विद्यार्थी सायबर कॅफे किंवा अन्य माध्यमातून अर्ज करत असतात. सध्याच्या "लॉकडाउन'च्या परिस्थितीमुळे ऑनलाइन अर्ज दाखल करण्यात येणाऱ्या संभाव्य अडचणी लक्षात घेता, ही मुदतवाढ दिली जात आहे. बी.पी.एड., बी.एड.-एम.एड. इंटिग्रेटेड कोर्स, एम.पी.एड., बी.ए./बी.एस्सी.बी.एड इंटिग्रेटेड कोर्स, एम.एड. या अभ्यासक्रमांच्या प्रवेशासाठी होणाऱ्या सीईटीकरिता आता विद्यार्थ्यांना 8 मेपर्यंत ऑनलाइन अर्ज दाखल करता येईल. 

हेही वाचा > VIDEO : ह्रदयद्रावक! लॉकडाऊनमध्ये माऊलीच्या नशिबाची दैना..वंशाचे दोन-दोन दिवे असूनही तिचे जीवन रस्त्यावरच!

सीईटी परीक्षेच्या तारखेत होणार बदल 

दरम्यान, या अभ्यासक्रमांच्या प्रवेशासाठीची सीईटी परीक्षा मे महिन्यात होणार होती. यापूर्वीच्या वेळापत्रकानुसार बी.पी.एड.करिता 11 मे, बी.एड.-एम.एड. इंटिग्रेटेड कोर्सकरिता 12 मे, एम.पी.एड.करिता 14 मे, बी.ए./बी.एस्सी बी.एड. इंटिग्रेटेड कोर्सकरिता 20 मे, एम.एड. या अभ्यासक्रमाची सीईटी 26 मेस होणार होती; परंतु आता अर्ज भरण्याच्या मुदतीत वाढ केली असल्याने परीक्षांच्या तारखांमध्येही बदल होण्याची शक्‍यता आहे. या तारखांसंदर्भातील सूचना 7 मेपर्यंत स्वतंत्ररीत्या जारी केली जाणार असल्याचेही सीईटी सेलतर्फे स्पष्ट करण्यात आले आहे. 

हेही वाचा > ह्रदयद्रावक! आई कुठे शोधू तुला गं? लॉकडाऊनमध्ये आईला भेटण्याची धडपड ह्रदय हेलावणारी!