जुने नाशिक : कोरोना (Corona) नियमांसह पोलिस आयुक्तांनी केलेल्या नियमांचे उल्लंघन केल्याप्रकरणी आमदार प्रा. देवयानी फरांदे यांच्यासह दहा जणांवर भद्रकाली पोलिस ठाण्यात गुन्हा दाखल करण्यात आला.

राज्याचे विरोधी पक्षनेते देवेंद्र फडणवीस (Devendra Fadnvis) यांना फोन टॅपिंगप्रकरणी बीकेसीतील सायबर पोलिस ठाण्यात जबाब नोंदविण्यासाठी नोटीस पाठविण्यात आली. श्री. फडणवीस यांना दिलेली नोटीस आणि चौकशीचा राज्यभर भाजपकडून निषेध केला जात आहे.

नाशिक शहरातही भाजपचे पदाधिकारी आणि कार्यकर्त्यांकडून निषेध व्यक्त केला. नोटीस प्रतीची होळी करण्यात आली. या वेळी ‘ठाकरे सरकार हाय हाय, उद्धव ठाकरे हाय हाय’, ‘फडणवीस साहेब आगे बढो, हम तुम्हारे साथ है’, अशा घोषणा देण्यात आल्या. भाजपचे पदाधिकारी मोठ्या संख्येने या वेळी उपस्थित होते. आंदोलनादरम्यान कोरोना नियमांचे उल्लंघन करत गर्दी जमवली. केवळ आंदोलनाची परवानगी असतानाही मोठ्या प्रमाणावर गर्दी जमवत जाळपोळ केल्याप्रकरणी आमदार प्रा. देवयानी फरांदे, सुजिता करंजीकर, संगीता जाधव, वैशाली जाधव, सोनल दगडे, बबलू परदेशी, अशोक गोसावी, वसंत उशीर, गणेश कांबळे, अरुण शेंदुर्णीकर, पवन उगले यांच्यावर पोलिस कर्मचारी सतीश धनगर यांच्या तक्रारीवरून गुन्हा दाखल करण्यात आला आहे.