Nashik News : जिल्हा परिषदेतील माध्यमिक शिक्षणाधिकारी प्रवीण पाटील यांचा कार्यकाळ पूर्ण होण्याअगोरदरच त्यांची तडकाफडकी नगरला बदली झाली.

या विरोधात प्रवीण पाटील यांनी शासनाच्या ‘मॅट’कडे धाव घेतली होती. (Postponement of Praveen Patil's transfer from MAT nashik news)

यात ‘मॅट’ने पाटील यांच्या बदलीला स्थगिती दिली असल्याचे वृत्त आहे. मात्र, प्रत्यक्षात बदली स्थगितीचे आदेश प्राप्त झालेले नाही. तत्कालीन माध्यमिक शिक्षणाधिकारी वैशाली झनकर यांच्यावर लाचलुचपत विभागाने कार्यवाही केल्याने हे पद रिक्त होते. नोव्हेंबर २०२२ मध्ये या पदावर धुळे येथून प्रवीण पाटील यांची बदली झाली होती.

प्रवीण पाटील सात महिन्यांपूर्वीच ते माध्यमिकला रुजू झाले होते. त्यांचा कार्यकाळ पूर्ण झालेला नसताना त्यांची तडकाफडकी बदली झाली. जिल्हा परिषदेच्या सुपर फिफ्टी अभिनव उपक्रम राबविताना पाटील यांना दूर ठेवण्यात आले होते.

हेही वाचा : Credit Card फसवणूक....काय घ्याल काळजी?

त्या वेळी प्रशासनाकडून झालेली तक्रार तसेच पालकमंत्री दादा भुसे यांनी पाटील यांच्या कामकाजाविषयी लेखी तक्रार केल्याने पाटील यांची बदली झाल्याची चर्चा जिल्हा परिषदेच्या वर्तुळात होती. या बदलीविरोधात पाटील यांनी शासनाच्या ‘मॅट’कडे दाद मागितली होती. ‘मॅट’मध्ये बुधवारी झालेल्या सुनावणीत या बदलीला दोन दिवसांची स्थगिती देण्यात आली होती.

दोन दिवसांची स्थगिती संपल्यावर त्यावर शुक्रवारी (ता.२१) पुन्हा सुनावणी झाली. यात ‘मॅट’कडून केवळ मंत्र्यांच्या पत्रावर बदली कशी केली, तसेच बदली होऊन केवळ सात महिनेच झालेले असताना बदली कशी केली, अशी विचारणा केल्याचे समजते. त्यावर ‘मॅट’ने निकाल राखून ठेवला होता. पुन्हा सुनावणी प्रक्रिया पार पडली. यात बदलीला स्थगिती दिल्याचे सांगितले जात आहे. मात्र, याबाबतचे अधिकृत आदेश प्राप्त झालेले नाहीत.